T.4000 yn ioh uwei u nongri jingri, na ka T.1088klur klur ka sorkar

Ban thied 2 ki khun sniang, 2 khun blang bad 50 tylli ki khun syiar
Shillong,21 Jymmang:
Ka sorkar Meghalaya ka la buh thong ba kan theh tyngka sha ki paidbah da kaba ai ia ki skhim ri jingri kaba haduh T.1088.9 klur tyngka ha ka san snem, kata naduh mynta u snem haduh u 2022 bad na ka bynta une u snem ka sorkar ka la pynbna ba kan pynlut T.127 klur tyngka bad ka la buh thong ruh ba kumba 50 hajar tylli ki longing kin ioh jingmyntoi na katei ka skhim kaba la tip kum ka Livestock Mission bad la ong ba ia katei ka skhim yn pyniaid da ka Meghalaya Piggery and Livestock Development Society.
Katei ka khubor ba bha ka la pynkmen shikatdei eh ia ki paidbah kiba im ha ka rep ka riang bad ha ka ri jingri. Ban tip kumno u paidbah u ioh jingmyntoi na katei ka skhim u Rupang u la ioh ban ia kren bad u Director jong ka Veterinary and Animal Husbandry u Dr.B.Rijal. Kaba phylla kaba la pynkyndit ruh ia u nongthohkhubor haba ia kren bad u Director katei ka tnad ri jingri ka long ba kat na katei ka spah bad ka hajar klur tyngka kaba ka sorkar ka la buh ban sam sha u paidbah, ka pisa ban poi sha u nongri jingri ka long tang T.4000 bad katei ka T.4000 ka dei na ka bynta ban thied 2 tylli ki khun sniang. Na bynta kiba kwah ri blang yn ai symbai ar tylli ki blang khun bad kiba ri syiar yn ai 50 tylli ki syiar khun.
U Dr.Rijal u la iathuh ba haduh mynta ka sorkar ka dang mang pisa dang T.25 klur tyngka ban pyniaid ia katei ka kam bad ia katei ka pisa yn pyniaid lyngba ki Society kum ka Meghalaya Piggery and Livestock Development Society ( MPLDS), ka Meghalaya Dairy Development Authority ( MDDA) nangta ka rukom ai jinghikai na ka MeghaLAMP. U la ong ba ka sorkar kan buh ruh ia ki jaka ot doh kiba rit ha ki nongkyndong, la mang ban pynlut ia ki kali ban leit ai jingsumar ia ki jingri jong ki paidbah ( Mobile Dispensaries), la mang ruh ban pyntip paidbah ia katei ka skhim lyngba ki kotkhubor. Hadien ba kitei ki Society ki la leh ia kaba donkam u la ong ba ka pisa kan poi sa ha ki District bad na ki district yn pynpoi sha ki C&RD Block bad na Block pat yn pynpoi ia ka pisa sha u paidbah.
U Dr.Rijal u la ong ruh ba ka sorkar kan ym pynbunkam satia ban sam ia ki paidbah da ki symbai hynrei kan shu pynpoi beit da ka pisa sha ki bad ki hap ban thied hi ia ki symbai jingri jong ki. Haba kylli kumno ka sorkar kan jied ia ki paidbah nongioh jingmyntoi-u la ong ba ka shong ha ka jingjied ka Village Employment Council ( VEC) kaba hap ban jied ia kito kiba la biang ka sem ri jingri kaba la pynshna lyngba ka skhim MNREGA. Kawei ka VEC kan hap jied kumba 40 ngut ki nongioh jingmyntoi kiba duk tam hynrei na katei ka 40 ngut kin don tang kumba 10 ngut ki ban ioh ia ka skhim ri jingri bad kiwei pat ki 30 ngut ki lah ban phai noh sha ka kam rep kaba don jingioh na katei hi ka skhim.
U la iathuh ba na ka skhim 100 sngi ne ka MNREGA yn pynshna sem sniang ia ki paidbah ha ka jinglut kaba T.44,000 tyngka eiei bad ka sem blang ha ka jinglut kaba T.39,000 tyngka eiei. Ia kitei ki sem sniang sem blang ya pynshna lyngba ka skhim 100 sngi. Haba la kylli na u Director hato ia katei ka pisa ka Livestock Mission ne ka Mishon ri jingri kaba da ki hajar klur tyngka ka sorkar ka hap ne-em ban pynphai ia katei ka jinglut sha ka 100 sngi, u Dr.Rijal u la ong ba kam don eiei kum kata.