T.400 bad T.700, kwah kyntiew bai bylla sngi ka KHNAM

Shillong: Ka Khun Hynniewtrep National Awakening Movement (KHNAM) ka la dawa na ka sorkar ba kan pynkiew noh ia ka bai bylla sngi namar ba ka la rit palat ban ianujor bad ka jinglong ka juk mynta.

Mynta ka sngi, ka KHNAM ka la mut ban kynduh ia u Labour commissioner jong ka jylla ban dawa kyntiew ia ka bai bylla ia ki nongtrei Sorkar kiba trei kontrak ha ki kyrdan bapher bapher. Hynrei namar bym don u Labour Commissioner, ka la shu buh tang da ka jingthoh sha ka Deputy commissioner jong ka tnat Labour.
Haba kren sha ki lad pathai khubor, u working president jong ka KHNAM, u bah Thomas Pasah u la ong ba ka jingsiew ka Sorkar ia ki nongbylla sngi kumba long mynta ka long 340 tyngka shi sngi ia ki bym pat nang, 380 ia kiba nang malu mala, bad 420 tyngka ia kiba la tbit shi sngi.

“Ngi la phah ia ka jingtyrwa ba ia ki bym pat nang, dei ban ai T.400 tam shi sngi, kiba la tbit ki dei ban ioh T. 700 shi sngi”, la ong u bah Thomas.
U la ong ba ka dor kaba buh ka sorkar kaba la duna palat khamtam ha ka juk mynta kaba rem ki mar ki mata, kaba lah ruh ban ktah ia ka ioh ka kot jong ki nongtrei.

Na ka liang ka KHNAM ka la dawa ruh ba ka sorkar kam dei ban shu pynheh ia ka bai bylla sngi, hynrei ka dei ruh ban ai ia kiwei ki jingai kumba dei ban long katkum ba la kdew ha ka ain.