T.40 lak, ka bai bam ha Pinewood & T.8lak ka bai liengsuin

rNa bynta ka Panorama Films Festival ha Shillong
Shillong, 16 Nailar:
Katkum ka jingtip lyngba ka RTI kaba la buh ha ka pej Facebook jong ka kong Agnes Khar shiing, President CSWO la iohi ba la wad jingtip ia ki jinglut jingsep jong ka sorkar ha kaba ia dei bad ka jingpynlong ia ka Panorama Film Festival dang shen ha nongbah Shillong. Katkum katei ka jingwad jingtip la iohi ba la phah sha ka sorkar ba kan mang pisa T.87, 07 890 tyngka (Phra phew hynniewlak hyniew hajar phra spah khyndai phew tyngka ) hynrei ka sorkar ka la mang tang T.76, 39, 184 tyngka (Hynniew phew hynriew lak lai phew khyndai hajar shispah phra saw tyngka). Ia katei ka pisa ka sorkar ka la siew ha ka 31 tarik u lber,2004 katba ia kaba sah pat kaba sa T.10, 68, 706 tyngka la ong ba ka sorkar kan sa siew ha u snem ia khein ia diah jong u 2014-2015. Ia ka pisa ba la ioh la ong ba la thep ha ka Treasury Civil Deposit.
Katkum katei ka jingtip la iohi ruh ba la wai haduh 28 tylli ki kamra ha Pinewood Hotel, Shillong na ka bynta ki 23 ngut ki ba la shah khot kyrpang bad kitei ki kamra ki don la ki jong ki jong ki dor ba kynthup naduh ki Deluxe, Super Deluxe, Presidential Suite, Presidential Cottage, bad haba ia khein baroh tang ka bai kamra ka kot T.50, 39, 184 tyngka (San phew lak lai phew khyndai hajar shispah phra phew saw tyngka). Ka bai bam ki nongshah khot sngewbha tang hapoh Pinewood Hotel ka long T.16,43,893 tyngka, katei ka long na ka bynta ka jingsah jong ki kaba hynriew sngi.
Katba ha Blueberry Inn pat la wai 4 tylli ki kamra na ka bynta 4 ngut ki nongshah khot sngewbha na ka bynta 6 sngi, ki kamra ba la bat ha Bluberry Inn ki dei ka Deluxe bad Super Deluxe , ka jinglut tang ka bai kamra ha Blueberry ka long T.1,44,216 tyngka katba ka baibam pat ha Blueberry ka long tang T.1181 tyngka. Ia ki kamra ba wai khnang tang na ka bynta kiba wan na bar jylla katba ki ba nangne na ka jylla pat la pynbit pynbiang tang ki bai leit bai wan da u Manager ba pynlong ia katei ka Film Festival. Kumba la paw ha katei ka jingwad jingtip la iohi ba ia ka Bill ba la lut ha Pinewood bad Blueberry la pynpoi sha ka tnad DIPR ha kaba la pyni ruh ba katei ka tnad kam pat siew naba ka dang ap pisa na ka Treasury.
Haba pyni bniah ia ki jinglut jingsep na ka bynta katei ka Festival la iohi ba tang hapoh Pinewood Hotel ka bai kamra ka poi T.3,55,985 tyngka, ka jingbam na bynta ki nongshah khot sngewbah ka kot T.16,43,893 tyngka nangta ka bai bam ja step ja miet ka poi T.24, 09, 104 tyngka. Ha Blueberry Inn baroh ka long T.1,44,216 bad bai kamra bad bai bam. Nangta la iohi ba sa ka bai lut na ka bynta ban siew bai shong liengsuin ki nongshah khot sngewbha ka long T.7,94,716 tyngka. Nangta pat sa ka bai kamra ha Convention Centre hapoh Pinewood ka long T.3, 37,080 tyngka, ka pisa ba mang ban pynlut da u Manager ba pynlong ia ka Festival ka long T.27, 29,774 tyngka . Baroh kitei ki jinglut hapoh Pinewood , Blueberry bad ka bai shong liengsuin, ka pisa ba bat u manager ka kot T.87, 07, 890 tyngka.
La iohi ba ki don 30 ngut ki nongshah khot sngewbha kiba wan na Delhi, Kolkata, Mumbai, Guwahati bad na kiwei de ki jaka ryngkat ki kyrteng jong ki bad la pyni ruh ha ka jingtip katno la pynlut na ka bynta uwei uwei u briew ha kaba la iohi ba la pynlut palat T.70 hajar, don pat T.60 hajar tyngka ia uwei u briew hapoh Hotel.
La iohi ruh ba la pyntip ba ka Star Cement kaba dei ka kompeni pynmih dewbilat kaba don ha Lumshnong, Jaintia Hills ka la iarap ban pynbna paidbah ia katei ka Panaroma Film Festival ha kaba ka la siew T.5 lak tyngka sha ka DIPR lyngba ka banker’s Cheque kaba don ia u nombar 729363 bad la thep ia katei ka pisa sha ka Account ka DIPR.