T.33 klur, bei ka UCIL ia ka KHADC ban shna surok Wahkaji

Shillong, 19 Nailar:
Ka Uranium Corporation of India Limited (UCIL) ka la bei tyngka T.33,16,92,390 tyngka (Lai phew lai klur khad- hynriew lak khyndai phew ar hajar laispah khyndai phew tyngka) ia ka Khasi Hills Autonomous District Council (KHADC) na ka bynta ia ka surok Wahkaji –Mawthabah kaba jngai 20 kilomitar. Katei ka long katkum ka jubab ia ka jingtip ba la wad na KHADC, lyngba ka aiñ wad jingtip ka Right To Information (RTI). Kat-kum ka jubab ia ka RTI, ka KHADC ka la ong ba kam shym la don kano kano ka jingai NOC na ka Council ban shna ia katei ka surok, hynrei ka la don tang ka jingiasoi jingiateh (MOU) kaba ki ar liang kata ka UCIL bad KHADC ki la ia soi ha ka 12 tarik u Kylla lyngkot,2006. Ka jingjngai jong katei ka surok ka long 20 Km.
La sdang ban pyn-trei ia katei ka surok ha u bnai iaiong jong u snem 2006, hynrei la jubab ba ym lah ban pyndep lut ia katei ka surok na ka daw jong ka jingthmu ban shna ia ka Double Lane da ka Ministry of Road &Transport jong ka sorkar India bad ka UCIL ka khlem bei tyngka shuh na ka bynta kaba sah. Ha katei ka RTI la jubab ruh ba katkum ka jingiasoi ha ka Clause 5 jong ka MOU , la pyntrei ia katei ka kam da ka KHADC lyngba ki kontraktor kiba don haduh 282 ngut.
Ha ka jingiasoi MOU kaba une u nongthohkhubor u la ioh jingtip lyngba ka RTI, ka kyndon ba nyngkong jong ka MOU ka dei ba katei ka projek kan kynthup ia ka jingkhlong ia u Uranium Ore na ka bynta ban pynmih ia u U3O8 kum u Magnesium Di-Uranate bad hadien yn phah sha ka Nuclear Fuel Complex, Hyderabad na ka bynta ban pynkylla sha u Nuclear Fuel na bynta ban pynmih bording.
Ha katei ka MOU na ka liang ka KHADC la soi da u CEM ha katei ka por u bah HS Shylla katba na ka liang ka UCIL la soi da u Chairman and Managing Director u R.Gupta. Ki la don ruh ki nongsakhi na baroh arliang ha kaba na ka liang ka KHADC la sakhi da u bah W.Mynsong (MDC barim ka Jirang), u bah R.V Lyngdoh (MDC barim ka Mylliem) , u Dr.P.W Khongjee (MDC barim ka Sohra) bad u bah A.Shangpliang Secretary ka KHADC katba na ka liang ka UCIL pat la soi da u A.C Kundu, u U.S Tiwari, u bah F.D Rynjah, u P.K Mohanty bad u A.B Samanta. (Ki la don haduh 15 tylli ki kyndon ba la ia soi ha katei ka MOU kaba yn sa thoh bniah ha ka sngi kaba bud).