T.300klur, ki bym siew bai ding sha ka MeECL, ong U CMD

Shillong:Nalor ka jingkyrduh bording na ka jingbym biang ka rukom pyniaid, ka tnad pynmih bording ka jylla ka Meghalaya Energy Corporation Limited (MeECL) ka la sah bill jin haduh kumba 300 klur tyngka haduh mynta na ka jingbym siew ki paidbah, ki kompeni bad ki tnad sorkar.

Haba kren sha ki lad pathai khubor, mynhynnin ka sngi, u Chairman-cum-Managing Director ka MeECL u Sanjay Goyal u la ong ba haba khein kyllum ka jingbym siew ki paidbah ia ka bai thang ding ka la kot sha ka 300 klur bad mynta ka MeECL ka la pyrshang ban pynthymmai ia ka rukom treikam, wat ban ot ding noh ia ki bym siew.

“Haba khein kyllum baroh ka jingkhein bym pat siew ki paidbah naduh ki riew shimet, ki kompeni, ki tnad sorkar, ka la long kumba 300 klur tyngka kynthup ruh ia ki nongthang ding kiba khlem lap shuh shaei ki don”, la ong u Goyal.
U la iathuh ba u la phah jingthoh sha ki kompeni pynieng tower mobile ba kin siew ia ki bai pynbam ding ha u tower kaba da ki lak tyngka bad lada kim siew, ka Corporation kan ot noh ia ka jingpynpoi bording.
Ha kajuh ka por, u Goyal u la iathuh ba ka jingkiew ka um ha pung Umiam ka dang long tang 6 phut eiei na ka jingslap ha kine ki sngi bad kam pat biang satia ban ioh ding bun bad ka dang donkam shibun ban ioh slap, bad ka dei ka jingduna um kaba jur tam ha kine ki phew snem ba la dep.

“Ngim pat hun ia ka jingdam ka pung Umiam, namar ba kam pat lah ban pynmih bording bun bad ngi khmih lynti ban ioh slap shuh ha kine ki sngi”, la ong u Chairman ka MeECL. U la ong ba ha ka por mynsngi, ka jingpynlip ding kan kham duna lada ioh slap bun ka pung Umiam lait noh ha ka por mynmiet. U la ong ba ka jingkieng dam ruh yn sa pyndait thymmai bad ka sorkar ka la shim khia ia kane lyngba ka skhim ka sorkar India kaba ai skhim ban pynthymmai ia ki dam ban pynmih bording bad ia kane ka kam, dang pule bniah ki stad na ka IIT Guwahati.

U la ong ba namar kane ka jingkyrduh bording, ka sorkar ka la pynbeit ban thied bording na ka NTPC na iew madan ban pynduna ia ka jingpynlip ding.
U la ong ba kyrmen ba ki unit pynmih bording na ka Leshka Project ruh kin sa lah ban pyntreimam noh ban pynmih bording ha kine ki sngi nalor ka Ganol Project.