Shillong, 5 Nohprah:
Ka Sohra Challenge ka la pynbna ba kan ai Buskit ia uno uno ne kano kano ka briew kiba ioh kem ia ki nongthanglum ha Sohra, katei ka Buskit la pynbna ba yn ai T.3000 tyngka (hajar tyngka), ha kaba ki ba ioh kem ne kiba iohi ia ki nongthang lum ki dei ban pyntip sha katei ka seng ha u phone no. 8575976991 ryngkat ki sakhi ki satar kiba biang kiba lah ban pynshisha ba ki kem ia u briew uba leh ia katei ka kam.
Ka Sohra Challenge lyngba ka kyrwoh ba la pyllait paidbah da u Chairman jong ka- u bah Batista Khongphai, ka la pynpaw ka jingsngewsih ban iohi ba ka jingthang lum ha Sohra ka dang jyllei haduh kine ki sngi wat hapdeng ka jingtrei shitom jong ki tnad sorkar ban pynjyrngam bad pynneh pynsah ia ki khlaw ki btap. Ka la kynthoh ruh ba ka long ka jingduhnong kaba khraw namarba kiba bun ki syntiew -ki kynbat bad ki khniang -ki ksiah , ki thapbalieh- thapbalong kiba don kyrhai ha ki lum ka shnong Sohra ki la nang duh jait katba nangmih ki snem namar ka jingkynrei palat ka jingthanglum pathar.
Shuh shuh ka kyrwoh na u Chairman ka SC ka la ong ba nalor ka jingthang lum kaba la pynduhnong shuh shuh ka dei ka jingpyllait laitlan ia ki masi kiba la bam lut ia ki jingthung jingtep ki paidbah kiba la thung lyngba ka jingai symbai jong ka Agriculture District Training Centre, Shillong. Ka kyrwoh ka la ong biang ba katei ka jingpyllait laitlan pathar ia ki masi ka la nang ktah bad pynduh mynsiem ia ka jingiashim bynta shitrhem jong ki paidbah ban pynjyrngam ia ka shnong Sohra bad ban pynkhie im biang ia ka kam rep ha ka shnong Sohra. Halor kane na ka liang ka Sohra Challenge ka la ong ba kan sa phah da ka jingthoh sha u SDO Civil Sohra ba un leh eiei ha kaba ia dei ia ka jingioh laitlan jong ki masi shang makia khlem nongsharai kiba la pynjot ia ki kper ki phrah jong ki paidbah kiba rep ha Sohra.
Phi don ban ong eiei?