T.300 die blak simcard ha Nongpoh

Nongpoh, 3 Lber:
Hadien ka jingtip na ki paidbah bad ka jingiai buddien kaba slem halor ka jingdie tuh ia ki simcard, hynnin ka sngi ki dkhot jong ka H.Y.C Nongpoh Circle, ki la ioh ban bat ia u trai jong ka Asha Watch’s Subagya, kaba don ha Nongpoh, hadien ba ka seng kala lap ba u trai jong katei ka dukan u mlien ban die tuh ia ki simcard sha ki paidbah khlem da iaid katkum ki kyndon ain.
Ka jingioh jong ka seng ban bat ia utei u trai jong ka dukan halor katei ka kam beain jong u, ka long hadien ba ka seng ka la  pynap shrip lyngba u wei u dkhot jong ka seng, uba la leit ban leh mynleh thied ia ki simcard khlem kino kino ki kot ki sla kia biang na ka bynta ban ioh simcard, ha kaba na ka liang u tei u trai jong katei ka dukan, khlem da bun ktien, hynrei u la ai bad die ia ka simcard haka dor T.300/- (Lai spah).
Hadien ka jingioh ban bat bad lap ia ki jingshisha halor ka jing donkti jong utei u bar jylla ha ka jingdie beain ia ki simcard, na ka liang ki nongialam jong ka HYC Nongpoh Circle, ki la aiti noh sha ki bor jong ka ain, khnang ba kin leh ia kaba donkam.
Ka seng, ka ruh pynpaw ruh ia ka jingsngewkhia halor ka jingnangroi jong ki riew khwan myntoi shimet, kiba ju mlien ban kamai da kaba shu die (Black) iaki Simcard mobile, namar lyngba jong kine ki Simcard tuh, kaba wanrah ia shibun ki jingsniew, ki kam pyntriem, lyngba kine ki simcard ba khlem kyrteng, kaba buh jingeh ruh ban lap iaki jingshisha namar ba ki dei ki simcard ba shu die tuh khlem da lah ban pynshisha ia u trai ba bat ia ka.