T.30 hajar shi sngi kamai ka Nan Polok, lada bha ka suin bneng

Shillong, 03 Nailar: 
Ka jingmih na ka jingkhrong ia ki nong rungkai ha Nan Polok ka iapher katkum ka aiom. Katkum ka jingtip kane ka jaka bam lyer pynngad jong ki briew ka kamai ym duna ia ka 30 hajar ha ka shi sngi ha ka por ba jur ki nongwan jngohkai kham tam haba rang ka bneng. Hynrei ka don pat ki sngi ba jur slap, ka pynmih tang kumba 15 ne 16 spah tyngka ha ka shi sngi.
U Rupang u la ioh ban iakren bad u Range Forest officer ba peit ia kane, u Bah NL Marwein u la iathuh ba ka jingmih ha ka shi snem kam duna ia ka 16-17 lak  ha ki snem ba la dep bad ka pisa ba la kamai, ka la pahuh ban siew ia ki nongtrei kiba la buh ha katei ka jaka Mynta u snem ngi khmih lynti ba ka jing mih kan ym duna ia ka 35 lak eiei namar ba ngi la pynkiew dor thymmai ia ki nongwan rung”, la ong u Bah Marwein. U la ong ba ha ki snem ba la dep, ka dor la buh T. 2 tyngka ia ki khynnah, katba T.5 tyngka ia ki rangbah. “Ngi la buh dor thymmai naduh u Iaiong ha ka dor T. 5 tyngka ia ki khynnah bad T. 10 tyngka ia ki rangbah”, la ong u Bah Marwein.
U la bynrap, “la kumno kumno mynta u snem ka jingmih ka lah ban poi sha ka 35 lak eiei”,.
Katkum ka rekod ba la buh ha kine ki ar bnai naduh u Jymmang haduh u Jylliew, ka jingdon jong ki briew ba wan rung ha kane ka jaka bam lyer pynngad ka la kot sha ka 51708 ngut.
Katkum ka jingiathuh u Bah Marwein, ka aiom ne ki bnai ba jur bha ki nongwan jngoh kai ka dei ha ki bnai Jymmang haduh Nailur, bad bun na kine kiba wan jngohkai ki dei na bar jylla bad wat na ri Bangladesh ruh. Kiba bun kiba wan rung kai ha kane ka jaka, ki dei briew kiba na jylla West Bengal, Assam”, la ong u Range Officer bad bynrap, ki don ruh kiba wan naduh ri Bangladesh. Katkum ka jingtip, ki trai jaka na kane ka jylla, ki duna kiba rung lait noh tang katto katne. Kane ka jingmih ka long beit thik na kaba die ia ki tiket ban rung shapoh, katba ia ka jingshong lieng, la pyniaid da ka Meghalaya Tourism Development Corporation (MTDC) bad ia ki dohkha la peit da ka tnad Fishery. Kane ka jaka iaid kai ka plie baroh shi taiew lait noh ha ka sngi Hatmajai ka khang namar ba ka don ka jingpynkhuid ia ka.