Shillong: Ka Kong Ibakyntilin Mary Umdor, kaba dei ka longkmie ba shong ba sah ha Mawlai Mawtawar kaba la shah kyntait ban wan kha khunlung ha Ganesh Das Hospital ha ka 28 Naitung 2020, hynnin ka sngi ka la ïathuh ba ka Meghalaya Human Right Commission(MHRC) ka la rai pynrem ïa ka Ganesh Das Hospital bad ka la hukum ba ka dei ban siew bai lut ksan 3 lak tyngka.
Haba kren sha ki lad pathai khubor, na ka liang u Nongïalam ka Hynñiewtrep Youth’s Council (HYC) ka ïathuh ba ka jingkyntait jong katei ka hospital ban shah ïa katei ka longkmie ban ïoh jingsumar ha u snem 2020 ka la pynlong ïa katei ka long ïing ban duh ei ïa ka mynsiem ba kordor jong i khunlung ka Kong Ibakyntilin Mary Umdor. Na ka liang u nongïalam HYC u pynrem ïa kaei kaba ka hospital ka la leh beiñ ïa katei ka longkmie.
Shuh shuh u nongïalam ka HYC u la pynpaw ïa ka jingsngewnguh kyrpang eh ïa ka MHRC kaba la shim khia ban ai rai pynrem ïa ka pyrshah ïa ka Ganesh Das Hospital bad ban hukum ban siew bai lut ksan sha katei ka longkmie. U nongïalam ka HYC u la pynpaw ruh ïa ka jingsngewnguh kyrpang ïa u Dr Aman War uba dei u Director ka DHS uba la shimkhia ban pynïoh ïa ka jingbishar ba hok ïa katei ka longkmie.
Shuh shuh utei u nongïalam u la ïathuh ba ka jingjia kaba la jia ha i Kong Ibakyntilin kam dei satia kaba dang thymmai hynrei kiba bun kiba la mad jingeh haba ki leit shah ai jingsumar bad u la ïathuh ba ka seng ka ïoh jingujor kaba bun wat tang ha kine ki khyndiat sngi kiba la dep.
Shuh shuh u la kyntu ïa ki bor pynïaid ka Hospital ba ki dei ban pynbha ïa ka rukom ai jingshakri bad ban pynthikna ba ki nongtrei ki dei ban ai ka jingshakri kaba paka bad ba ki nongtrei ki dei ban nang ruh ban pynïadei ban kiba wan shah ai jingsumar.
Na ka liang ka Kong Ibakyntilin Mary Umdor, ka la pynpaw ïa ka jingsngewnguh kyrpang eh ïa ka HYC Mawlai Circle kaba la shimkhia ban ïarap lem ïa ka naduh ka sien kaba nyngkong wat haduh ka khyllipmat kaba mynta. Shuh shuh ka Kong Ibakyntilin Mary Umdor, ka la kyntu ruh ïa ka Hospital ba kam dei ban ai lad ba kum katei ka jingjia kan dang jia biang namar kane ka buh ïa ka jingma kaba khraw ïa ki longkmie kiba wan shah sumar ha katei ka hospital namar kiba bun hi kiba wan shah sumar ha katei ka hospital ki dei kiba wan na ki long ïing kiba duk bad na ki thaiñ nongkyndong.
la ioh ka pisa ne em