T.2lak shet ka Facebook, ia ka longkmie

Shillong, 06 Nailar: 
Wat hapdeng ka jingiai maham ki pulit na ka por sha ka por ban nym biej ha ki runar ha Face book bad kiwei ki social networking site, hynrei dang bun kiba dang biej bad kane ka la jia ia kawei ka longkmie kaba la shah shet ha ka Face book haduh T. 2 lak.
Kawei ka longkmie ka la ujor ha ki pulit ba u parlok jongka uba kam na ri Bilat u Eric Phillips na Westham, England u la iathuh ba u la phah ia ka song sha ka bad ka dei ban thep pisa T. 3000/- kum ka khajna.
Hynrei ha ka 3 tarik Nailar, u la phun sha ka ba ka dei ban thep biang sa T. 30,500  ban ioh ia katei ka song bad sa T. 1,86,000 kum ka kuna namar ba katei ka song ka don ka ksiar bad 50,000 Pounds.
Da ka jingkwah ia kane ka song, kane ka longk mie ka la thep ia kane ka pisa ba la phah da u nong-Bilat. Hynrei hadien ka la sngewthuh ba ka la shah shet pynban ha kaba ka song ka khlem poi bad jah syndon jar.
Ki pulit ki la ong ba ki kam beain lyngba ki social networking ka jur bha ha kane ka nongbah ha kaba kiba khambun kiba biej ki dei ki kynthei kiba ngat ei ha ki riew shukor khlem ithuh eiei.
Katkum ka jingkhein ba la ioh ki pulit, kumba 20 tylli ki kam shukor bad kam thok ki jia lyngba ki social networking tang ha u snem 2012 bad 34 tylli ha u snem 2013.
Bun kiba shah thok ruh da ka SMS bad ka jingioh phun na ki briew kiba iathuh ba ki la jop ia ka khalai nusip katta katta lak bad ki dei ban thep pisa ban  pynpoi sha ki hynrei ki dei tang ki riew shukor.
Mynshem snem ruh kawei ka longkmie na Mawlai  ka la shah thok ei haduh T.11 lak ha u paralok Facebook jongka u Eric Jack uba pynbiej ia ka ban pynpoi song ba rem dor.