Shillong, 11 Jymmang:
Ki shipai BSF kiba don ha Umsyiem-East Khasi Hills ki la ioh kurup haduh 3000 tylli ki Sari kiba la thmu ban khaïi tuh na India sha Bangladesh, kitei ki sari baroh ki shongdor haduh T.28 lak tyngka. Ki shipai BSF ki la iohi ia kawei ka Mahindra Pickup kaba kit da ki song kiba heh ba heh hajan pud ka India bad Bangladesh, kumta ki la leit ban talasi ia katei ka kali hynrei ha katei ka por ki briew kiba dang thmu ban pynhap ia kitei ki tiar ki la phet krad noh marsien iohi ia ki shipai bad haba la poi ha katei ka jaka ki la lap ba dei da ki jain Sari.Katei ka jia ha ki jaka bym don ka jingker sainar. Ha kawei pat ka jingjia ki BSF kiba don ha Pyrdiwah-East Khasi Hills ki la ioh kurup haduh 2010 kilo ki kha tyrkhong kiba shongdor haduh T.9 lak tyngka kiba la thmu ban khaïi tuh sha Bangladesh hynrei ki briew ki la phet krad noh ha ki khlaw kiba rben. Ki BSF ki la ong ba ki la I suba ia ka jingiaid lynti ki briew ha khappud ryngkat ka jingkit khlieh ha ka khlieh jong ki bad hadien ki la pynap shrip kumno ban ioh bat ia ki hynrei namar ka jingdum bad ka jingrben ka khlaw ki nongkhaii tuh ki la phet krad noh.
Ki shipai BSF ki la iathuh ruh ba ki nongkhaii tuh na kitei hi ki shnong bad ka thain ba marjan ki don ka jingiadei ba jan bha bad ki nongkhaii tuh na Bangladesh bad ki ju peit siar ruh ia ka iaid ka ieng ki shipai kumno ban ioh lad ban pynrung pynmih ia ki mar khaii tuh hapdeng ki ar ri.
Phi don ban ong eiei?