T.28 lak, kurup ki pulit ia ka tyngka GNLA ba thmu thep sha Bank

Shillong, 1 Nohprah:
Ki pulit ka jylla kiba don ha ri lum Garo ki la peit pyrman bha ha kine ki sngi ban khanglad ia ki seng lehnoh kum kak GNLA, ASAK bad kiwei pat ba kin pyndonkam da ki riew paidbah ban pynkylla pisa biang ia ki kot 500 bad 1000 jong ki namarba ki la ioh jingtip kham mynshuwa ba ka GNLA ka pyrshang ban thep sha bank ia ka pisa jong ki lyngba ka account jong ki riew paidbah.
Mynta ka sngi ki pulit ka South Garo hills ki la kem ar ngut ki riew paidbah kiba la tip kyrteng kum u Sengchang Momin bad u Solly Sangma bad ki la ioh kurup na ki T.28 lak tyngka ki kot 500 bad 1000 suda katba kitei ar ngut ki dang thmu ban leit thep ia katei ka pisa ha ka bank account jong ki ha Tura.
Hadien ba la shah kitei ki phla ha ki pulit ba katei ka pisa ba ki thmu ban wan thep ka dei ka pisa jong u Area Commander ka GNLA u Baichung.
Ki pulit ki la hukum ia ki ki bank ba kin bat ia kitei ki bank account khnang ba kin ioh tohkit. Dang ha ka 17 tarik u naiwieng, ki pulit ka East Garo hills ki la kurup T.35 lak tyngka na Batsrang bad Saljepa , Williamnagar na ki nongiarap ka GNLA.
Ki pulit ki la pyntip sha ki bank kiba don ha baroh kawei ka jylla ba ki dei ban peit pyrman bha lada don ka jingthep pisa na ki paidbah kaba ki i artatien bad haba lap kum kitei ki jingjia ki dei ban pyntip sha ki pulit. Ki la kyntu ruh ia ki riew paidbah ba lada jai ba ki shah pynbor ha ki lehnoh ha kum kitei ki jait kam ki dei ban ai jingtip sha ki pulit.