Shillong: Ki MDC ka Liang pyrshah ki la pynpaw ka jingbitar halor ka T.28 klur tyngka kaba u CEM ka KHADC u la ai kam sha ki 16 ngut ki kontraktor na ka bhah T.32 klur tyngka kaba ka KHADC ka dang shu ioh shen na ka sorkar pdeng. Ki la kynnoh ba ia katei ka rai ban pynleit ia ka T.28 klur sha ka jingdonkam ka District Council u CEM ka KHADC u bah Pynshngaiñ N Syiem u la shim rai marwei hi bad khlem da ia syllok ia ka Executive Committee. “Ki para MDC kiba don ha ka Executive Committee ruh kim don jingtip eiei ia kane, ngi lyngngoh kumno u CEM u nud ban shim rai marwei hi” ong u bah Teinwell.
U bah Teinwell Dkhar MDC ka Shella ryngkat u bah Donkupar Sumer MDC ka Umsning haba kren sha ki nongthohkhubor: Rupang.
“Dei na katei ka daw ba ngi kum ki MDC ba la shah jied ngi la leit ban pan jingshai na u hynrei u CEM u la kren pynban ia ngi da ka ktien dkhar u la ong “Are Bhai”, ka rukom kren jong u ruh ka pyni ba u kheiñpoh ia ngi ki MDC, u ong ba ka shong ha ka mon jong u ban pyniaid ia ka pisa, ngi sngewsih ban ioh kum katei ka jubab, naba katei ka pisa dei kaba la ai sha ka District Council ym sha u CEM marwei ba un leh katba mon” ong u bah Teinwell.
U bah Teinwell u la iathuh ba u CEM u la thaw ia ka Council Planning & Implementation Committee jong ka KHADC ban ai kam sha ki kontraktor ban pyntrei ia katei ka T.28 klur tyngka, hynrei u la ong pat ba katkum ki kot ki sla ym shym la don ki ophisar ka District Council ne u Secretary ruh u ban soi bad ka don beit tang ka soi jong u CEM marwei hi. Katkum kitei ki kot ki sla kiba paw la iohi ba ki don haduh 16 ngut ki kontraktor kiba la ioh kam bad kitei ki long u bah Kitbok Warbah uba la ioh ban pyntrei ia ka Office Building kaba don ha Garikhana bad katei ka kam ka poi T.7.5 klur, “Ka Office Building kaba kumno shuh ngim tip, ngi iohi ba ki Building kiba bun ki la don lypa sa kaba kumno u CEM u mut ngim sngewthuh” ong u bah Tein.
Nangta sa T.7.5 klur tyngka la ai sha ka M/S Rodeka Enterprise ban shna ia ka KHADC Traditional Cultural Centre ha Umiam (jingkieng Kalong), T.1.5 klur tyngka ban shna ia ka District Council Court ha Nongstoiñ la ai sha u bah Biangki Lyngdoh bad sa T.1 klur tyngka la ai biang ha utei u juh u kontraktor ban shna ia ka iew die jhur ha Iewduh. T.20 lak la ai sha u bah A.Rynjah ban shna ia ka kynroh jong ka KHADC, “Sa kaba kumno ka kynroh ngim sngewthuh shuh namarba kumba ka long mynta ngi i ba la kynroh lut” ong u bah Tein.
Nangta sa T.50 lak tyngka la ai sha u bah Fullstar Rani ban shna ia ka kynroh ha Lailad, T.30 lak tyngka la ai sha u Kitborlang Nongphlang ban kynroh ia ka ophis ka KHADC ha Nongpoh. T.50 lak sha u bah L.K Sawkmie ban shna ia ka iew Byrnihat, T.50 lak sha u bah Medhi Sumer ban shna ia ka iew ha Laitlyngkot, T.40 lak sha u bah J.Nongsiej ban shna ia ka Quarter ha Nongpoh, T.4.5 lak sha ka M/S Kharsyntiew Industries ban shna pynitynnad ia kaba shabar bad shapoh jong ka Guest House kaba don ha MDC Hostel, “Ngim tip shuh ban shna ia katei la mang T.1.12 klur tyngka, sa kaba kumno kata ka jingshna u CEM u mut” ong biang u bah Tein MDC ka UDP na Shella konstitwensi.
Sa T.25 lak la ai biang sha ka M/S Kharsyntiew Industries ban shna pynitynnad ia kaba shabar bad shapoh jong ka Court Building, Shillong, “Kane ka jingtrei ruh ka dang iaid na ka mang tyngka kaba rim na ka T.133 klur , ngim tip shuh sa ia kaei pat ki mut” u la ong biang. T.2.11klur tyngka la ai sha u bah A.Lyngdoh ban shna ia ka iew ha Mawkyrwat, T.4.5 klur tyngka la ai sha u bah Dondee C Khongsit bad kong H.Kharphuli ban shna pynbha bad maramot khyndiat khynsoit ia ka surok Wahkaji-Mawthabah bad nalor katei ki don sa ar tylli ki jingtrei kiba ym shym la ioh ia ka dor, ong u bah Tein bad kitei ki dei ban shna pynbha ia ka surok Umdohlun-Wahkaji-Phlangdiloin bad ia ka kam la ai biang sha u bah Biangki Lyngdoh bad bah P.Lyngdoh bad kawei pat ka kam dei pynbiang ia ki tiar ki tar jong ka Guest House ha Nongpoh bad ia ka kontrak la ai sha ka kong M.Syiem.
U bah Teinwell u la ong ruh ba ia baroh kitei ki kam kiba u bah Pynshngaiñ u la ai kontrak la shu ai beit kumto sha kiba u mon khlem da khot Tender haba shai. Ha katei ka jingiakren bad ki nongthohkhubor la donlang ruh ki MDC ka Liangpyrshah ba kynthup ia u bah Donkupar Sumer, kong Rona Khymdeit, bah Donevan Kharwanlang, bah Lamphrang Blah.