T.200, ka kuna ia kiba die bad kiba dih sikret

Shillong,7 Nailar:
U Deputy Commissioner ka East Khasi Hills u sanjay Goyal u la mana ban dih sikret ha ki jaka paidbah bad kumjuh ruh ki nongdie ba kim dei ban die sikret ne duma, ha ka jing jngai, kaba 100 kam najan ki jaka pule bad lada lap kin hap ha ka kuna kaba T.200 tyngka.
U DC u la pynbna ia katei ka jingmaham ban dih sikret ha ki jaka paidbah ha ka jingialang ka National Tobacco Control Programme and Enforcement of the Cigarettes and other Tobacco Products Act (COTPA) kaba la long mynta ka sngi ha ryngkat ka jingiadonlang ki heh ophisar jong ka skulbah NEHU.
kane ka jingia lang kaba la pyn long halor ka jing pynmih ka tnad ka koit ka khiah ka sorkar pdeng ia ka hukum ha u jymmang 2008 kaba la khang pyrshah ban dih sikret ha ki jaka paidbah. Ki jaka paidbah kum ki jaka bam Restaurant , ki Hotel, ki hospital, ki jaka ieng Bus bad kiwei pat ki long ki jaka ba la mana bay m bit ban dih sikret. Katei ka hukum la khang pyrshah ruh ia ki nongniah kali bay m bit ba kin dih sikret hapoh kali.
U DC u la pyntip sha ki paidbah ba lada ki lap ba don ba leh pyrshah ia katei ka hukum ki dei ban pyntip da kaba shu phone sha u nombar 1000, 2222277(Police Controll ), 2223451 (Sadar Traffic Police) .
Lah ban kynmaw ba katei ka hukum kaba la mih ha u jymmang 2008 na ka sorkar pdeng ka ka sdang ban treikam ha kane ka nongbah Shillong tang khyndiat por ha ki khyndiat snem mynshuwa ha kaba la iohi ba katei ka hukum ka la shu jah noh namar lehse ki paidbah kim shym burom satia ia katei ka hukum , kaba lehse dei ruh namar ka jingsynjor jong ka tnad ba dei ban shimkhia ia katei ka kam kaba mynta la pynkhie im biang sa shisien ia katei ka hukum ka sorkar pdeng.