Shillong: Ka seng HYC H.Y.C Riwar Mihngi Circle, ka pynpaw ia ka jingsngewkhia ha khmat U District Officer (DTO), East Khasi Hills, halor ka jingkynduh jingeh ki paidbah jong ka thain Riwar ha kaba iadei bad ka bai kali.
Ka seng, ka ong ba naduh ba don une u jingpang Covid 19 ka sorkar ka la pyrkhing ha ka leit ka wan ki paidbah ha ka jylla jong ngi, bad la iohi ruh ba ki kali iew kiba ju kit ia ki Nongleit Nongwan (Passenger) ki la shim kabu sha ba palat khlem da pyrkhat shuh ia ki long iing baduk bad kiba duna ka ioh ka kot bad kumjuh ia ki khynnah pule. Ka seng ka la lap ruh ba kane ka long kaba shisha namar ki ki kali kamai ki ju thep bun ki briew wat haba na ka liang ka sorkar ka la khang ban kit bun briew.
La pyni nuksa ruh ia ka bai kali na Pynursla sha Shillong, kaba long T.200 haduh T.250 (kaba jngai tang kumba 50 km duna na shillong ha pynursla). Kane ka jingleh ki nongniah, ka la ktah shisha ia ki briew kiba duk kiba duna ka ioh ka kot khamtam ia ki khynnah pule kiba kiew sha shillong ban pyndep ia ka Exam jong ki.
Kumta ka seng ka kyrpad ia U DTO, ban shimkhia bad ban phai khmat lem ia kane ka jingeh ki paidbah.
Kum ka seng kaba ju sngap ia ka jingeh ki paidbah ka sngew dei ban pynlong da ka jingpynshai ba tikna sha ki paidbah lyngba ki lad pathai khubor lane ki jingthoh sha man la ki Association Tourist ba ki dei ban shim bai kali kat kum ka jingbthah na ophis ka transport, ong ka kyrwoh na U bah Bah Edmund K Khongngai, President bad U Bah Glorious Swett, Secretary, H.Y.C Riwar Mihngi Circle.
Kane ka long shisha kumta ym tang ha ki thain pynursla, hynrei kiwei kiwei ki jaka ne thain ruh, la hapoh East Khasi ne Jaintia & kiwei. Ngi sngewkmen ba ka Seng HYC Riwar sepngi ka shimkhia halor kane. Bad ngi kyntu iaka HYC Seng Kmie hi baroh kawei ban peit lang sha baroh ki thain ka ri khasi Jaintia jong ngi halor kane ka jingeh ba ki paidbah ki la mad ha ka jingiadei bad ka jingshim kabu ia ka jingpynkiew baikali palat pud. Ngi kyrmen bad khmih lynti ruh ba ki DTOs kin shimkhia ban pynbeit ia kane.