T.20 hajar daiñ kuna u OC Dawki PS, ar tylli ki trok kit mawshun

Shillong, 15 Naiwieng:
Ha ka 12 tarik mynta u bnai, u Officer Incharge ( OC) ka Dawki PS u la kem kynsan ia ar tylli ki trok dumper ha Dawki bad u la daiñ kuna ia ki T.10 hajar kawei bad ar tylli ka long T.20 hajar. Kitei ki ar tylli ki trok kiba la shah kem ki don ia ki nombar AS-24C 2442 bad kawei pat AS 24C 2445. Kitei ki nongkhaii ki ba trei ia ki kam khaii ha Dawki LCS da ki phew snem ki la leit ia kynduh ia utei u heh pulit ka Dawki ha katei ka sngi ban pan jingshai balei la kem ia ki bad u la jubab ba la kem namar ba la ujor da ki trai jingkieng thew kali na Sohkha (Weight Bridge) namar ba kitei ki trok kim kiew ha katei ka jingkieng thew kali.
Ha ka shithi sha u OC ki la ong ba ki iathuh ha u ba kim kiew ha katei ka jingkieng thew kali namar ba kin kiew beit ha ka Weight Bridge jong ka tnad Transport ka sorkar kaba don ha Tamabil-Dawki, hynrei u OC um sngap bad ki hap ban pan jamin katkum ka aiñ ban pyllait ia kitei ki kali.
Ki la ong ba hadien katei ruh u OC um kwah ban ia treilang bad ki bad u la sdang ban thlia sa ia ki laisen haba la biang ki laisen u thlia sa ia ki kot kali , kitei ki la iathuh ba ki kot kali ki don sha Shillong bad u OC u la daiñ kuna T.10 hajar kawei ka trok.
Ha katei ka shithi kaba la soi kyrteng da u Everest Langstang, Jinesh Lamin,Kerioham Lamin, Kenny Kharsandi, Labbor Gashnga, Bulon Mukhim, Stevenson Khonglah bad Larius Khonglah ki la thoh kumne, ‘To jait ba phi long u ophisar uba trei hok la ka kam ba la pynkhamti bad bynshet ha phi da ka sorkar, sngewbha pynshai ia ngi ki bym stad kum phi bad ki bym pat pule ia ka aiñ’.
Kitei ki briew ki la pan jingshai na u OC halor kumno un leh bad kaei ka aiñ ia kito ki kali Dumper thymmai kiba iaid na Nongtalang sha Tamabil khlem nombar, kumno un leh ia ki kali kit mawshun, kali kit maw thup, kit jhur, kit syieng kiba leit pynhap sha Iew bar ri- sha Bangladesh, mano ban kitkhlieh ia ka jingiaid jingieng ki kali kiba iaid sha Bangladesh ki bym biang ki kot ki sla-hato u la ju peit ne-em ia ki, ki la ong ruh ha katei ka jingthoh ‘ka aiñ jong phi ki la treikam ha kitei ki ar tylli ki dumper kit mawshun, ki ain jongno pat ki ban treikam ia ki kali bym biang kot biang sla’. Ia katei ka shithi ki la phah kopi sha u Director General of Police, Shillong, Comissioner Transport , Shillong, Deputy Comissioner West Jaintia Hills, SDO Amlarem Sub-Division, DTO Jowai Enforcement –West Jaintia Hills.