T.2 hajar na uwei u nonghikai, ba mut ialeh mukotduma ka MSSASA “Kein noh ka ka ialeh mukotduma” ong ki para nonghikai

Shillong:Myn hynnin ka sngi na ka liang jong ki nonghikai SSA, kiba don ha ka kynhun jong Meghalaya SSA School Assiociation (MSSASA) ki la wan ban kyntu ia ki nongialam jong ka MSSASA ban pyn sangeh noh ia ka jingthmu ban ujor mukotduma pyrshah ia ka sorkar jylla.

Lah ban kdew hangne, ba na ka liang ki nongialam jong ka MSSASA, ha ki bnai ba la dep ki la shim ia ka rai ban ujor sha ka ingkashari pyrshah ia ka sorkar lada ka dang iaid mynthi halor ka jingdawa ban ai kam pura, ia ki nonghikai SSA ha ka ba mynta ki lasdang ia ka ne ka bynta da kaba ki la lum ia ka pisa kaba long T.2000 uwei u nonghikai.
Haba kren ha kane ka sngi na ka liang u bah D Nongbri u la ong ba kum ki nonghikai SSA, hi ki dei ki ba dang shaniah ha ka sorkar ha ka ba ka don ka jingpynslem ia ka tulop hynrei haduh mynta hi ki dang ioh ka tulop ka khlem sangeh.

U la ong ruh “Kan bha ia ngi kum ki nonghikai ban shu ia kren bad ka sorkar jylla ym ban ia leh pyrshah ia ka da kaba ujor sha ing kashari,namar ba kumba ka long hi ki nonghikai SSA ki dei ki ba la thung da ki school Managing Commitee bad na ka liang ka sorkar kam pat ithuh ia ki.
U la ong ruh ba bun na ki nonghikai SSA ki don ka jingsheptieng ioh ki duh ia ka kam, namar ba bun kiba ym pat lah ban pynbiang ia ka kyndon jong ka NCTE (national Council for Teachers Education) norm bad kim pat ioh ia ka syrnot D.El.Ed (Diploma in Elementary Education) ha kaba kim pat biang ia ka improvement kaba ka sorkar ka buh 45 % .

“Ka jingsheptieng jong ngi ka long ba lada ki ai case na ka liang ka sorkar kan lah ban pyntrei kam ia kiba bun ki kyndon ha ka ba khlempep bun na ki nonghikai hi kin duh ia ka kam” u la ong.
“Ngi kyrpad ia ki nonghikai ba kin bishar bniah ia kine baroh ha ka ba ngi khlem wan ban pyrshah lane pynbor iano iano hynrei lehse ioh ki don ki nonghikai kiba ym tip ia ka sdang ka kut hynrei kin duh ia ki kam ki jam jong ki ” u la kyrpad shuh shuh.

Na ka liang u bah B Lyngdoh u la ong ba ka jingkyrpad ia ka MSSASA ban ym ujor pyrshah ia ka sorkar namar ba lada ki ujor ai ka case da ki kyrteng jong ki nonghikai kan mih ka jingeh namar ba kin hap ban leit hajir marwei marwei.
U la kyntu ia u myntri rangbah ka jylla u Conrad K Sangma bad u Myntri ka tnad pule puthi ban mang pisa ha ka dorbar mang pisa ka ban sa long na ka bynta ki nonghikai SSA ba lada ka sorkar pdeng ka slem ban pyllait tulop na ka liang ka sorkar jylla kan dang lah ban ai ka tulop jong ki bad u la kyrpad ruh ban shimkhia ban pyllait noh ia ka tulop ka ba dang sah bad kumjuh ia ka arear kaba dang sah la 8 bnai mynta.