T.2.50 lak la shah ban pynlut ki kyrtong ka MDC

Shillong 14 Rymphang:
Ki kyrtong kiba iakhun ia kane ka elekshon MDC 2014 ki dei ban pynlut tang hapoh ka T. 2.50 lak ( ar lak sanphew hajar) bad lada ki pynlut tam ia kane ki hap ban ai jubab sha ka tnad elek shon ka sorkar jylla, la ong u Commissioner Secretary ka tnad District Council Affairs ka jylla u Bah Jopthiaw Lyngdoh.
U Bah Lyngdoh u iathuh ba kane ka jing pynlut ka long tang na ka bynta uwei uwei u Kyr tong u ban iakhun ia ka elekshon MDC.
Ki kyrtong ha KHADC baroh ki don 123 ngut bad 89 ngut ki kyrtong ka JHADC ki ban ia khun ha kane ka elekshon.
Ki jaka thep vote kiba don jingma ha kane ka elekshon KHADC bad JHADC ki don 210 tylli bad napdeng kine 145 tylli kidei hapoh ka KHADC bad 65 ha JHADC.
U Bah Jopthiaw Lyngdoh u la iathuh ba na bynta kane ka elekshon MDC ka sorkar India kam shym la ai ki bor pahara bad na ka laing ka sorkar jylla ka la pyndonkam hi da ki pulit lajong.
U la ong ba ka sorkar ka pyndonkam 6 tylli ki Battalion ban pahara na bynta kane ka elekshon nalor 1000 ngut ki Home Guard bad ki CRPF kiba ladon lypa ha kane ka jylla.
“Ngi donbok ba kam don ka elekshon ha Garo Hills hynrei lada ym ioh bor pahara na ka sorkar pdeng kan long ka jingeh”, la ong u Bah Lyngdoh.