T.1,698.87klur, kiew ka jing ioh kamai ka jylla, ong ka Taxation

Shillong: U Commissioner jong ka tnad lum khajna, u Arunkumar Kembhavi, u la pyntip ba ka don ka jingkiew, ha ka jingioh lum ia ka khajna ha ka jylla Meghalaya, na ka bynta u snem 2020-21.

U Arunkumar Kembhavi, u la iathuh ba wat la ka don ka ka jingshah ktah ka ba jur ha ka liang ka ioh ka kot ha ka Ri bad ka jylla baroh kawei, na ka daw ka khlam Covid-19, hynrei ha u snem 2020-21 ka jylla ka la ioh lum ia ka khajna ka ba long Rs 1526.50 klur.
U Kembhavi, u la iathuh ba haba ia nujor ha u snem 2019-20 ka jingiohlum khajna ka long tang T. 1488.37 klur, khlem da khein ia ka jingioh pisa, kaba wan na ka GST.

Lada shim bad ka jingioh buria na ka GST, ka jingioh lum khajna ha u snem 2020-21, kan long T. 1698.87 klur bad ha ba ia nujor bad ka Rs 1589.82 klur ha u snen 2019-20 ka pynpaw shai ba ka don ka jingkiew ha ka jingiohlum khajna da 6.86%.
Ka jingioh lum khajna na ka GST ha u bnai Lber, 2021 ka long Rs 101.75 klur ba kane ka la kiew ha ba ia nujor bad ka jingioh lum ha u bnai Lber 2020 ka ba long tang Rs 58.55 klur ha kaba ka la pynpaw ia ka jingkiew sted kumba 73.78%.

Kane ka jingkiew ha ka jingiohlum ia ka khajna ka dei na ka daw ba la pyntrei kam ia ki lad ki lynti kaba ka tnad taxation, ka la shim ban iada na ka jinglait tuh ka khajna bad ka dei ruh na ka jingtrei shitom jong ki officer jong ka tnad ban pynkiew ia ka jingsiew jong ki nongsiew khajna, ki ba la pynbeit ia ka rukom lum khajna na ki bonded warehouses bad ki petrol stations.
Ka tnad ha ka sien kaba nyngkong ka la pyntrei kam ia ka Tax Amnesty Scheme, lyngba ka Meghalaya Settlement of Arrears Act, 2020 ha kaba ka la don ka jing shimkhia jong ki nongsiew ia ka khajna kiba khlem siew la bun bun snem.

Ka tnad kumba ka long mynta ka ioh jingkyrshan ia ka GST, na ka NIC Meghalaya, kaba la pynbit pynbiang da ka GSTN, New Delhi bad ban pynkhlain ia ka jingkyrshan ia ka rule GST. U Kembhavi, u la ong ba ka sorkar ka khmihlynti ba ha u snem jong ka mang tyngka 2021-22 kan don ka jingkiew kaba khraw, ha ka liang ka jingioh lum ia ka khajna.