Sohra: Ha ka sngi saitjaiñ jong ka taiew ki nongialam ka KSU ki la hiar sha ki thaiñ Sohra ban jurip ia ka surok German Teknoloji (German Technology) kaba pyntrei da ka M/S CCL International Limited , Hawakhana-Tura. Katei ka dei ka surok Sohra-Mawsmai-Shella Road kaba jngai tang 8 kilomitar bad kaba la mang T.15,19,98,000 klur tyngka (Khadsan Klur khad khyndai Lak khyndai phew phra hajar tyngka) kaba la mang na ka Special Plan Fund. Ka tnad PWD (Roads) ka aiti ia ka Work Order ha ka 17 tarik u kyllalyngkot, 2017 sha ka M/S CCL International Ltd ban pyntrei noh ia ka kam bad la hukum ba katei ka kompeni ka dei ban pyndep ia ka kam hapoh 24 bnai.
Ki dkhot ka KSU kiba dang jurip ia ka surok German Teknoloji ha ka jaka shuwa ban poi sha ka shnong Laitryngud: Rupang.
Hynrei mynta ka la iaid 19 bnai katei ka kompeni kam pat leh eiei ia katei ka surok lait noh tang ka jingtheh khyndew kaba tang haduh ka lad ban leit sha Thangkharang Park. Ka la pynkmen ia ki paidbah katei ka thaiñ hadien ba ki iohi ba ka sorkar ka la mang tyngka kyrpang na ka bynta ban shna da kata ka surok kaba da ka buit Germany ha katei ka jaka kaba la shah iehbeiñ la bun bun snem phewse mynta ki paidbah ki hap ban mad ar shah ia ka jingjynjar namarba hadien ka jingtheh khyndew katei ka kompeni ka surok ka la kylla pynban kum ka ahor ktieh.
Ki nongialam ka KSU na Central body ha ryngkat ka jingdonlang jong ki nongialam ka KSU na Lait-tyra Unit, Sohbar Unit, Laitryngud Unit ryngkat ki nongialam jong ka KSU South Khasi Hills ba kynthup ia u samla Reebok Diengdoh ( Adhoc President) ki la iathuh ba ka daw ka jinghiar jurip jong ki ia katei ka surok ka dei hadien ba ki la ioh jingujor na ki paidbah ba katei ka kompeni kam shym la treikam satia hynrei la shu ieh shrah ia katei ka surok. U President ka KSU Lait-Tyra Unit u samla Bnai Lamin u la ong ba katkum ka Work Order ka por ia katei ka kompeni ka sah sa tang 5 bnai katba ka kam pat kam pat poi tang mar shiteng ruh. U la ong ba ka jingbym lah katei ka kompeni ban shna pyndep ia katei ka surok katkum ka por ka la ktah bha ia ki paidbah naduh ki kali kamai bad khamtam eh ka jingkiar ki nongwan jngohkai pyrthei ia katei ka thaiñ.
U Asst. Publicity Secretary ka KSU Central Body u samla O.Marbaniang ha ryngkat ka jingdonlang jong u samla Readyon Stone Nongrum ( Education Secretary) kiba dei ki nongpeit ia ka Sohra , u la ong ba shen ka KSU kan leit ban ia kynduh ia u Chief Engineer jong ka PWD ( Roads) ban pan jingshai balei ba katei ka kompeni kam trei satia ia ka kam ba la ai ha ka hynrei la shu ieh pynjynjar ia ki paidbah da kaba shu theh khyndew. U la ong ba ka por ia katei ka kompeni ka dang sah sa san bnai hynrei lada kam lah ban pyndep ia ka kam hapoh katei ka por ka KSU kan pynbor ia ka sorkar ba ka dei ban weng noh ia ka Work Order ba la ai sha katei ka kompeni bad ban ai sha kiwei pat kiba lah ban trei ia ka kam.
Shuh shuh utei u nongialam ka KSU u la ong ba katei ka juh ka kompeni ka la pyntrei ia ki surok ha ri Lum Garo kiba dei kita ki surok German Teknoloji hynrei tang khyndiat bnai hadien ba la dep ki surok ki la jot noh bad katei ka pynduh jingshaniah ia ki paidbah. Ka KSU ka la kyntu ia ka tnad PWD ba kan wan peit da la ki jong ki khmat ia ka rukom trei jong ka kompeni ia ka kam. Ki la pynrem ruh halor ka jingbret pathar katei ka kompeni ia ki plastic byrni dewbilat harud surok. Ka KSU Lait-tyra ka la kyntu ruh ia u MLA ka Shella u Dr.Donkupar Roy uba dei u Lamphang Ing dorbar ba un tuklar lem ia katei ka kam.