Shillong: U myntri rangbah ka jylla, u Conrad K Sangma, u la long ba ka sorkar jylla ka la mang ia ka bhah kaba T1500 haduh T2000 klur na ka bynta ka jingpynkhreh ia ka jaka ialehkai National Games ha Umsawli kaba don ha thain Mawdiangdiang.
Ia kane u Myntri Rangbah ula iathuh katba u dang let ban jurip ia ki jaka kiba la long trai da ka Meghalaya Urban Development Agency.
Halor kane ka jingialehkai National Games, u Myntri Rangbah u la ong ba shen ka sorkar kan sa pynbiang ia ki jingkhein jingdiah shuwa ban leit iakynduh ia u myntri rangbah duh ka ri.
“Ngi donkam ban pynlong ia ka jingjurip mynta, namar na ka liang jong ka sorkar ngin hap ban ai ia ka jingkhein Detailed Project Report ban pynkhreh pynbit pynbiang ia kane ka jaka bad kumjuh sa kiwei ki jaka na bynta kane,” la ong u myntri rangbah Conrad Sangma.
Ha kawei pat ka liang, u myntri rangbah ula ong ba ha kane ka shisnem, ka sorkar ka don hapdeng ka jingia pynbeit ryngkat bad ka Social Justice Ministry ha ka jingthmu jong ka ban thaw ia ka Stadium na ka bynta kito kiba anna ka met lane ki Specially Abled ia kaba yn shna ha kane hi ka thain kaba yn tei iaka stadium jong ka National Games 2022.
“Kyrmen ba ka sorkar kmie kan mynjur ia ka jingtyrwa jong ka sorkar jylla ban tei ia kawei ka Disability Stadium hangne ia kaba yn pyndonkam na bynta baroh kawei ka thain Sepngi jong ka ri India,” la iathuh u myntri rangbah Conrad Sangma.
Lah ban kdew ba katei ka Stadium ha Umsawli kan lah ban rung haduh 25-30 hajar ngut ki nongpeitkai, kawei ka pung jngi, ka Multi Utility Indoor Stadium bad ruh ki ing sah na bynta 2000-3000 ngut ki nong sah.
Ha kane ka sngi jong ka leit jurip la iadon lang ki ophisar ka tnad MUDA, PWD, MeECL, PHE, Sports bad kumta ter ter.
Phi don ban ong eiei?