T.144 klur khlem lah pyndonkam ka jylla, na ka pisa NEC

Shillong, 22 K’lyngkot: U nongialam  ka BJP Meghalaya u EK Sangma u la kynthah ba ka jingleit pan pisa khah khah ka sorkar jylla na ka sorkar pdeng kam don jingmut satia namar ba tang ia ka pisa na ka NLCPR ka North Eastern Council (NEC) ruh kam lah ban iapynlut ban pyntreikam ia ki kam pynroi.
“T.144 klur ka pisa na ka NLCPR ka NEC la pynphai biang sha ka sorkar pdeng namar ba ka jylla kam lah ban pyndon kam”, la ong u Sangma haba kren mynta ka sngi sha ki lad pathai khubor.
U la ong ba ha ka jingialang ka NEC ha u bnai Naiwieng 2015, ba la don lang u MP ka Tura u Purno A Sangma, u MP ka Shillong u Vincent H Pala, bad ki heh sorkar, la pynpaw shai ba ka pisa na ka NLCPR haduh T.144 klur khlem lah ban pyndonkam ba la ai sha kane ka jylla ban pyndep ia ki kam pynroi.
“Kumno ka sorkar jylla ka leit pan pisa hir shi hir na Delhi haba ia kaba la air uh kam lah ban pyndonkam, bad kane kam shong nongrim satia ia ka sorkar pdeng ban ai shi ai pisa khlem pyndonkam”, la ong u Sangma.
Ha kajuh ka por, u Sangma u la ong ba ka sorkar jylla kam dei ban shu pan bor pahara na ka sorkar pdeng ban iakhun ia ki lehnoh namar ba kan nym wanrah ia ka suk ka sain hynrei kan wanrah pynban ia ka jingeh.
“Ka sorkar kam dei ban shu pyndonkam da u dieng sympat hynrei ka dei ban pyndonkam ruh da ka jingieid ban ioh ban pyndem ia ki kam pyntriem, ha Garo Hills”, la ong u Sangma.