T.14 lak na U CEM ka KHADC, ia ka Kolej ha Pongkung

Shillong, 14 Jylliew:
U Chief Executive Member (CEM) ka KHADC u bah Pynshngaiñ N Syiem mynta ka sngi u la plie paidbah ia ka J.J M Nichols Roy College kaba don ha ka shnong Pongkung. Katei ka dei ka kolej kaba pyniaid da ka Balang u Blei bad ki pastor jong katei ka balang ki la pyntip ba la ai kyrteng ia katei ka kolej ha ka kyrteng jong u Rev.J.J M Nichols Roy kum ka dak ka jingkynmaw ieit ia u kum u nongseng bad u nongsaindur ia ka Balang u Blei ha kane ka ri Khasi -Jaintia. Ka Balang u Blei ha katei ka shnong ka don ia ka skul kaba la tip kum ka Pongkung Church of God Secondary School , hadien ba la kyntiew kyrdan sha ka Higher Secondary School bad mynta la kyntiew kyrdan shuh shuh sha ka kolej kaba la ai kyrteng da ka Rev.J.J M Nichols Roy College.
Haba kren kum u kongsan ha katei ka sngi u bah Pynshngaiñ uba dei u MLA bad MDC ka Mawsynram konstitwensi, u la ong ba u long uba donbok bha ban ioh plie ia katei ka kolej ha kum kane ka por kaba u long ruh u CEM ka KHADC naba ia katei ka kolej la ai kyrteng sha u J.J M Nichols Roy u kpa jong ka 6th Schedule bad u la ong ba donkam ia ki nongpyniaid jong katei ka kolej ban ia treilang bad ka District Council, naba ka kyrteng utei u rangbah ka don ka jingiadei ha District Council. Haba kdew ia ki kambah jong u Rev.Nichols Roy kiba u la noh synniang kumno ban wanrah ia ka 6th Schedule ban iada kyrpang ia ka jaitbynriew u bah Pynshngaiñ u la ong ba u dei u rangbah uba la iohi jngai lypa ia ka jingeh kaba ka jaitbynriew kan sa ia kynduh bad dei na katei ka daw u la saindur kumno ban wanrah da ka 6th Schedule ban iada kyrpang ia ka jaitbynriew rit paid.
U la pynbna ha katei ka jingialang ba un ai T.14 lak tyngka ha ki ar bynta na bynta katei ka Kolej, T.4 lak na ka bynta ban shna pynheh ia ka ing skul khnang ba ka Kolej kan ioh pyndonkam shipor kat bym pat dep ia ka jingtei kaba thymmai katba T.10 lak pat ban tei ia ka Building thymmai jong ka Kolej.Ha katei ka jingialang la wan ban sakhi da ki Rangbah Shnong ka Raid Saw-Symper, ki khynnah skul barim kiba la trei mynta kum ki ophisar sorkar, ki Pastor na ka Balang u blei Assam-Meghalaya, ki kmie ki kpa jong ki khynnah skul nalor ki khynnah skul bad ki nonghikai, ia katei ka jingialang la pyniaid da u Principal katei ka skul u Babu S.S Shullai.