T. 121 lak, pynbha madan 25 tylli ha u snem 2015-16

Shillong, 21 Nailar:
Ka sorkar jylla ka pynbha 25 tylli ki madan ialehkai ha ka jylla na ka skhim Mission Football ha ka jinglut kaba T.121 lak.
Katkum ka jingtip na ka ain wad jingtip na ka ophis ka State Sports Council (SSC), la pyni ba ki don 10 tylli ki madan ba la pynbha bad don kiba shu ker kynroh ba kynthup ha East Khasi Hills lai tylli kynthup ka pynbha ia ka madan Polo Madan N-1 T. 15 lak, madan ialehkai ka skul St Gabriel ha Nongkseh T. 12 lak , bad pynbha ia ka madan ha Umpling T. 15 lak. Kawei ka West Jaintia ka madan ha Ummulong T. 17 lak bad ha East Jaintia Hills ka madan Khliehriat T. 15 lak.
Ha West Khasi Hills la pynbha ia ka madan ha Nongthliew ha ka jinglut kaba T. 15 lak, ha West Garo Hills la pyntrei T.12 lak ban pynbha ia ka madan AGillanggre, ha North Garo Hills la pyntrei ia ka madan Matcha Melaram, bad T. 7 lak ia ka madan Songsan Ansengrama.
Ha East Garo Hlls la pyntrei ia ka madan Dambu Rongdeng T. 6 lak.
Kiwei pat ki 11 tylli ki jingshna ki long ka jaka peitkai ha madan Kiang Nangbah T. 25 lak, jaka shong ki heh ki hain ha madan Mawkyrwat T. 25 lak bad ha Mawlangwit, ha Mawkyrwat T. 25 lak.
Ka jaka peit bad shong ki heh ki dain ha Narangbari, Selsella T. 71 lak, ka pynbha bad shna ia ka jaka peitkai ha Babadam ha West Garo Hills T.55 lak, shna madan ha Phulbari West Garo Hills T.45 lak, shna pynbha iaka madan bad ka jaka peitkai ha Danakgre ha West Garo Hills T. 42 lak. Ka jingpynbha ia ka madan ha Boldamgre T. 70 lak ka South West Khasi Hills, shna ia ka rynsan ha Grengandi ka South West Khasi Hills T. 10 lak, pynbha ia ka madan ha Mukhla T. 10 lak bad shna ia ka jaka peitkai ha Pohkseh T. 10 lak. Baroh ka la kot sha ka T. 388 lak.
Nalor kine, la shna ruh ia ka Indoor hall ha Loomkyrwiang, West Jaintia T. 18 lak. La shna ia ki madan basketball ha lai tylli ki jaka kynthup ar ha East Khasi Hills bad kawei ka West Jaintia Hills ba kynthup ia ka madan ka Bharat Scout and Guide ha Umgtyngkar T. 15 lak, ha Khraw Sing Collge, Mawngap T. 9 lak bad ha Paduh T.9 lak.
Kiwei pat ki Indoor Hall ki long ka Laban Sorts ha Laban ba T. 132 lak, ka Indoor hall ha Lumparing ba T. 86 lak.