T.10,600 klur, ka jingbei pisa na shabar ri, ia ka jylla, ong U MR

Shillong:U Conrad Sangma, myntri rangbah ka jylla, ula leit rah ia ka mang pisa jong u snem 2023-2024 ha ka iing dorbar bad U Sangma, u kam ba ki 38lak ngut ki nongshong shnong jong ka jylla, ki la ai ia ka bor kaba kham heh ia kane ka sorkar, ba kan iai bteng ia ka jingshakri jongka sha u paidlang jong ka jylla.

Ha ka jingkren jongu, u iathuh, ba ka jingbei pisa na shabar ka Ri, ka kiew, na ka T.2,300 klur ha u snem 2018 sha ka T.10,600 klur ha u snem 2023 bad katei ka pisa ka wan na ka World Bank, Asian Development Bank bad ka Japan International Cooperative Agency bad la iathuh ba 90percent na kitei ki ram, yn siew noh da ka sorkar India, na bynta ka sorkar jylla.

U Sangma, ula pynsngew ruh, ba ka thong jong ka sorkar, ka long ban kyntiew ia ka GSDP lane ka Gross State Domestic Product sha ka T.80,000 klur ha u snem 27-28 bad ban pynlong ia ka Meghalaya, kaba pyniaid ia ka kamai kajih, kaba poi sha ka 10 billion dollar. La iathuh ruh ha iing dorbar, ba ka jingkiew ka kamai kajih ha ka jylla, haba khein, naduh u snem 2018 haduh u snem 2023, ka long da 6.75 percent bad ka mang pisa, kaba la leit rah mynta ka sngi, na bynta u snem 2023-2024, ka dei kaba duna pisa da T.1,592 klur lane kaba long 3.42 haba khein na ka GSDP.