T.10 lak klur ban ai ram nongrep; yn tei ing ia shi klur kiba khlem iing

Shillong, 3 Rymphang:
Ki nongialam ka BJP ha kane ka jylla hapoh ka jingialam u President Rangbah jong ka u bah Shibun Lyngdoh ka la pyntip paidbah ba ka sorkar pdeng ha kane ka mang tyngka jong ka la mang tyngka kham bun ia ki nongrep kaba long bun shah ia kaba la ju mang mynshuwa. U Vice President katei ka seng u Gagan Jain u la ong ba mynta u snem ka sorkar pdeng ka la mang T.10 lak klur tyngka na ka bynta ban ai ram ia ki nongrep.
Nangta u la ong ba ia ka tyngka ban bei da ka NABARD la kyntiew sha ka T.40 hajar klur tyngka bad ia ka skhim ring um rep, la kyntiew na ka T.20 hajar klur sha ka T.40 hajar klur tyngka. Na bynta ki thain nongkyndong utei u heh BJP u la ong ba ka sorkar pdeng ka la mang ban pynlut palat T.3 lak klur tyngka na bynta kiba bun ki kam pynroi. U la ong ba ka sorkar kaba ialam da ka BJP ka la buh thong ruh ban rat dyngkhong noh ia ka jingduk ha kaba ka la mang ba tang hapoh u 2019 kan weng noh ia ka jingduk jong ki shi klur tylli ki longing.
La kyntiew ruh ia ka MNREGA ban iarap ia ki nongrep bad la mang T.48500 klur tyngka, la buh thong ban kyntiew ia ka jingioh kam ki kynthei lyngba ka NREGA kumba 55%.U la ong biang ba ka sorkar BJP ka la buh thong ban shna ing ia kiba khlem ing khlem sem bad ka la mang haduh shi klur tylli ki ing. Ia ka Pradhan Mantri Gram Sadak Yojana ha u 2017-18 la kyntiew sha ka T.19,000 klur tyngka. Na bynta ka bording ka la mang ba hapoh u lber, 2018 ki nongkyndong baroh khoit ki dei ban ioh bording. Ka jingleh khuid leh suba lyngba ka Swacch Bharat Abhiyan ka la kiew na ka 42% ha u bnai risaw, 2014 sha ka 60% haduh mynta.
Na bynta ki jingtei bapher bapher u la ong ba ka BJP ka la nang T.4 lak klur tyngka, 3500 kilomitar ka lynti rel, ki jaka leit bar hapoh rel, 500 tylli ki Station bad na bynta ka surok ka sorkar BJP ka la mang haduh T.64,000 klur tyngka. Na bynta ka jingmyntoi ki briew ka thaiñ shatei Lam Mihngi ki heh BJP ki la ong ba ka sorkar kam shym la kdew ba ka la mang kyrpang hynrei ka la don la ka jong ka bynta ban ioh bhah bad la mang ruh T.36,000 klur tyngka.
Ia ka Mudra Loan Scheme kaba dei ka Scheme na bynta ki nongrep ban ioh ram khlem da donkam ban pynbiang ia ki kot ki sla ne ban pynshah da ki jingdon jingem ka sorkar ka la mang T.2,44,000 klur tyngka kaba long ar shah ia kaba la mang ha u snem ba la dep na bynta ki SC, ST bad ki kynthei. U la ong ruh ba ka jingsiew khajna kan don ka jingot kaba 5% na ka T.12,500 shisnem kaba mut ba manla u nongsiew khajna, u lait T.1000 tyngka shibnai bad katei kan pynmyntoi ia ki 3 klur ngut ki briew.