Shillong:U Producer uba dei ruh ha ka juh ka por u Director jong ka phlim 9-Lad u Bah Commander Shangpliang u la siew kumba T.1 lak ia ka actress, ka Wanri Pyngrope kaba la ak ia ka phlim 9-Lad kaba dei ka phlim khasi kaba la iaid iew bha bad kaba dang bteng ban pyni haduh mynta ha Bijou bda ha Anjalee Cinema.
Lah ban kdew hangne ba ka samla Wanri Pyngrope ka la ioh rah ruh ia ka nam best actress na ka Prag Cine Award lyngba ka ka phlim 9-Lad ha ka jingialang sam award kaba la long ha u bnai Rymphang mynta u snem.
Haba iakren bad u bah Commander Shangpliang u la iathuh ba, ka jingsiew jongu shilak ia ka samla Wanri pyngrope ka long kum ka dak ban pyrto ia ka jinglah jongi ban ak bha ia ka bynta jong ka actress kaba dei ka bynta kaba la khring ia kiba bun ki paidbah nongpeitkai.
U bah Commander Shangpliang uba dei ruh u President jong ka seng ki nongshna film ka Meghalaya Film Makers Association (MefilMA) u la pynpaw ia ka jingkyrmen ba ka karkhana shna phlim ha ka jylla kan sa nangkiew nangne shakhmat.
Shuh shuh u bah Commander Shangpliang u la pyntip ba ka jingpyni ia ka phlim 9-Lad ha Bijou Cinema kan dang iai bteng bad yn pyni khatduh ha ka 15 tarik Iaiong bad ka por kan dei kumjuh kata ha ka por 11 baje mynstep, 1 baje nohphai sngi, 3 baje janmiet, 5 baje janmiet bad ha ka por 7 baje janmiet. bad ha Glleria Anjalee Cinema ka long tang ar show kata ha ka por 3 baje janmiet bad ha ka por 5:30 baje janmiet.
U la iathuh ba ki briew haduh mynta ki dang bteng ban wan, hynrei u la ong ba ka jingpyni kan dei tad haduh ka 15 tarik bad u la kyrpad ia ki paidbah ki bym pat iohi ba kin wan noh ha lane shuwa ka 15 tarik.
U la iathuh ruh ba lada ki don kino kino ki seng kiba pynlong fete bad kiba kwah ban pyni ia ka phlim 9-Lad ha ki shnong jongki ki lah ban phone ha u number 8837287374 lane 9366232274 khnang ba yn lah ban iapynbeit kham bniah.
Phi don ban ong eiei?