Shillong:U MLA ka South Shillong constituency, u Bah Sanbor Shullai u la kitbok bad pynkup burom ia i meiieid Kmoin Wahlang iba la 76 snem i ban leit mihkhmat ia ka ri India sha ka jingiakop mareh sha ri Australia.
Kane ka jingpynkuburom ia i meiieid Kmoin ka dei kum shi bynta ban ai mynsiem ia i ban ioh ka jingjop naka bynta ka nam bad burom ia ka Ri bad ia ka Jylla Meghalaya.
Na ka liang u Bah Sanbor ula ai jingïarap ruh da ka song pisa ba T.1 lak sha i meiieid Kmoin Wahlang na ka bynta ka jingdonkam jong i, bad T.30 hajar ia u Bah Biningstar Lyngkhoi uba dei u coach kum ka dak jingai mynsiem ia ki ba kin wanrah ia ka jingjop.
“I mei ieid Kmoin I la don 76 snem, 16 ngut ki khun ki sah 12 ngut bad 54 ngut ki ksiew. Ka jinglut kaba jur kumba 2 lak tyngka tam bad in mihkhmat ia baroh khoit ka jylla, ia ka kur ka jait, ka iing ka sem jong I”, la ong u bah Sanbor.
I mei ieid Kmoin I dei na shnong Sngimawlein, kaba don ha thain Mawkyrwat, South West Khasi Hills.
“Lah ban ong lehse, kumno u bah Sanbor ula leit ai jingiarap sha kawei ka konstitwensi, nga sngewnguh ia ki paidbah ka South Shillong konstitwensi, nga dei u MLA ka South Shillong tangba nga dei u MLA ka Meghalaya namar ka MLA ka mut Member of legislative Assembly kaba mut ia ka jylla”, la ong u bah Sanbor.
U la ong ba ka iing jong u ka la hikai ban iarap ia ki para briew, kampher lada dei na kano kano ka jaka wat la shabar ka konstitwensi. “Ka rukom treikam jong nga, la hikai ha ka iing kaba, la u dei na ka konstitwensi ne u para shnong ne ba haiing ha sem ne dei uba nabar ka konstitwensi ruh, ngi iarap beit bad na kata ka daw katba kiba wan ha iing jong nga, la u dei nabar ne napoh konstitwensi ngam ju pylleit thylli, nga iarap beit”, la ong u bah Sanbor.
To ngin peit au kin leh kiwei ki MLA na ka bynta Jong I ne i mei ba ieid Jong ngi i ba la ialeh shitom shisha haduh ban da ioh mih khmat shaduh Australia…Khublei shibun bah shanbor phi la ai mynsiem ia ki ba bun kham tam ia ki samla ba kin nang ia leh shitom na ka bynta ka Ri bad jait bynriew