T.1.88 klur, phin sa ioh: CEM ia U Shylla

Shillong, 7 Rymphang:
U bah H.S Shylla u la ong ba katba dang ia sngap ia ki nongkren ha ka jingialang bah kaba la long mynta ka sngi ha Laitkor halor ka mat pyrshah MUDA u la pasiaw ia u CEM ka KHADC ban Pynshngaiñ N Syiem da kaba ong “Nga la ong ia u bah Pynshngaiñ ai ne phim ai ia ka T.1.88 klur kaba dang sah, naba nga ioh tang T.1.12 klur tyngka , u la ong ia nga ba un ai phin sa ioh sa T.1.88 klur” ong u bah Shylla bad ha katei ka por ba u krem ba ka Nongkrem ruh kan ioh kajuh ka bhah kaba mar T.3 klur tyngka kaba la mang ia uwei u MDC baroh ki paidbah ki la thep kti tyngeh.
Hynrei halor katei ka jingkren u bah Shylla u bah Pynshngaiñ u la ong ba u bahdeng Shylla u bhabok palat, namar ba hadien ba u la jop ia ka elekshon MDC shiteng samoi ka State Level Committee kam pat shym la mynjur ia ka T.10 klur tyngka kaba dei ka jingtyrwa ka KHADC ban pyntreikam na ka T.133 klur bad na katei u la ong ba un pyrshang ban leh ia kaba bhatam na bynta ki paidbah ka Nongkrem konstitwensi. U bah Pynshngaiñ u la khlem kren shai sha ki paidbah ha katei ka jingialang halor ka jingpynsngew u bah Shylla ba ka Nongkrem ka dei ba nioh T.3 klur tyngka watla u la kren sha ki kotkhubor ha kine ki sngi ba kaba heh duh lada ai sha kitei ki MDC kiba dang shu jop kan ym palat ia ka T.1.50 klur tyngka.