Syrtok ki paidbah ka Tamabil bad Muktapur ba pynieng kali khlemakor ki Trok

Shillong: Ki nongwan iew na ki shnong ba don ha shilynter ka surok Dawki-Muktapur kaba don markhap bad ka ri Bangladesh, ki la hap ban leit phai noh sha la iing tang ka daw ka jingdheng kali bad ka jingsniew palat pud ka surok.

Katkum ka thymmei khubor ba la ioh lum da u nongthoh khubor, la iathuh ba wat ki nonghikai bad ki khynnah skul ki la ngat ha kane ka dheng kali kaba shyrkhei bha.  Ka thymmei khubor ka iathuh ba ka jingdheng kali ka dei tang namarba ki trok kit mawshun na India sha Bangladesh ki ju pynieng kat haba lap kat haduh ba ka la wanrah ia ka jingdheng kali kaba jur ha shilynter jong kane ka surok.

“Ka jingeh ia ngi ki nonghikai ruh ngim ju poi biang por bad teng teng tang na ka daw jong ka jingdheng kali bad ka jingsniew palat ka surok  ngim lah satia ban poi wat tang sha skul ngi hap ban leit phai sha iing.  Ka dei ka jingduh kaba khraw tam bad kaba ktah shisha ym tang ia ngi ki nongshong shnong hynrei wat ia ka lawei jong ki khynnah skul,” ong ki katto katne ki nonghikai skul haba iakren bad u nongthoh khubor.

Na ka liang ki Waheh Shnong jong ka Dawki, Bakur bad Riahjalong ki la ujor sha u Sub-Divissional Officer jong ka Amlarem Civil Sub-Divission halor ka jingjur shaba palat kane ka jingdheng kali.

Ki paidbah ki kynnoh ba kane ka jingdheng kali ka dei na ka jingkhlem akor jong ki trok kit maw ba shalan sha ka ri Bangladesh kiba iaid lyngba ka khappud Dawki bad Muktapur.