Synran lang U Conrad Sangma, ha ka jingleit thep kyrteng U Modi na Varanasi

Shillong: Shibun ki nongialam jong ka kynhun synrop National Democratic Alliance (NDA) kiba na ka thain shatei lam mihngi, ki la leit ban synran mynta ka sngi, ia U Narendra Modi, myntri rangbahduh, haba u leit thep kyrteng ialade na Varanasi Lok Sabha.

Kitei ki nongialam, ki kynthup ia U Conrad K Sangma, myntri rangbah ka Meghalaya bad u nongialam ka seng NPP, U Neiphiu Rio, myntri rangbah ka Nagaland, U Himanta Biswa Sarma, myntri pla pisa ka Assam bad U Atul Bora, President ka seng AGP.

Nalor kitei ki nongialam jong ka thain shatei lam mihngi, la synran lang ruh da shibun ki nongialam jong ka seng BJP, ha katei ka jingleit thep kyrteng jong U Modi bad kitei ki kynthup ia U Amit Shah, President BJP, U Yogi Adityanath myntri rangbah ka Uttar Pradesh, U Rajnath Singh myntri kam poh iing ka sorkar India bad ka Sushma Swaraj myntri bar ri, nalor kiwei pat.