Synñiang surok ka President BJP ia ka balang Presbyterian

Shillong, 26 Iaiong:
Ha ka sngi saitjaiñ jong ka taiew ka President jong ka State Mahila ka BJP ka kong Pelcy Snaitang ka la plie paidbah ia ka surok Thiep Diengngan ban pynpoi shaduh sha ing mane ka balang Presbyterian, katei ka surok ka dei kaba don ha ka shnong Keniong kaba hap hapoh Ranikor konstitwensi. Ka kong Pelcy ka ban ia khun na ka seng BJP na Ranikor konstitwensi ka la bei tyngka ia ki jinglut jingsep baroh ban shna ia katei ka surok. U Tbn Aristar Thongni u la kren na ka liang ka balang ha katei ka sngi ha kaba u la ai jingiaroh ia ka kong Pelcy namar ka jingnoh synniang jong ka sha ka balang da ka surok.
Hapdeng ka jingpynthut u slap ki riew ngeit ka balang Presbyterian ha katei ka shnong bad ki shnong ba marjan ki la poi sha katei ka jaka ban sakhi lang. Lah ban pynkynmaw ba ka kong Pelcy kaba dei na ka shnong Tlongpleng ka la iakhun ha u 2013 na Mawshynrut konstitwensi hadien ba ka shah pynduh tiket ha ka seng Congress hynrei mynta ka kynti ka la rai ban iakhun na Ranikor konstitwensi na ka seng BJP.