Synniang ki Khasi State, sha ka pla iarap u myntri rangbahduh

Shillong: Kum shibynta ban kynmaw ia ka sngi ha ka ba u Shri. C Rajagopalachari, Governor General ka Ri India, (uba mynta ngi khot President Ri India hadien ka 1950) u la mynjur bad soi ia ki dulir treaty Instrument of Accession bad ki kyndon ha ka Annexed Agreement bad ki arphewsan (25) Khasi States (individually bad collectively) 72 hyniewphewar snem mynshwa ha ka 17tarik August 1948, ka kynhun kaba phra ngut na ka Federation of Khasi States, ka kynhun ki Khlieh Nongsynshar ki Hima Khasi kum shibynta ban kynmaw ia katei ka sngi mynta ka 17 August 2020 ha ka juh ka tarik ki la leit hiar sha ka office Meghalaya BJP, Bivar Road Shillong, kaba la ialam da u Paiem Kestonbel M Syiemlieh, Dy Syiem Hima Nongkhlaw, bad la kynthup lang ia ki jong u Bah John F Kharshiing, Adviser & Spokesperson, Federation of Khasi States, u Bah Hamphrey L Ryntathiang, Lyngdoh Hima Lyngiong & Secretary, FKS, u Paiem Habapan S Syiem, Dy Syiem Hima Khyrim, Joint Secy, FKS, u Bah Khlainni Lyngdoh Nongbri, Lyngdoh Raid Nongbri, Hima khyrim, u Bah Wandonbok Jyrwa Lyngdoh Khynnah Raid Lawkhla, Hima Nongspung, u Bah S Sohliya, Myntri Hima Mawphlang, u Bah J Hunter Jarain, Joint Secy Hima Nongmynsaw, ha kaba la ia kynduh ia u Bah Ernest Mawrie, President, Meghalaya Bharatiya Janata Party, bad kiwei kiwei ki nongkitkam ka Meghalaya BJP ha kaba la aiti ia ka jingnoh synniang kaba la lum na ki Hima /Elaka Khasi bad Jaintia lyngba ka cheque kaba INR 1,15,000/- (Shi Lakh Khadsan Hajar ) kum ka jingnoh synniang (contribution) sha ka Prime Minister’s Citizen Assistance and Relief in Emergency Situations Fund (PM CARES Fund). Lah ban pynkynmaw ba ki Hima shimet ki la noh synniang lang sha ka Chief Ministers Relief Fund, kita ki long ka Hima Khyrim, Hima Nongstoin, Hima Nongkhlaw, Hima Mawphlang, bad Hima Mylliem.

Ha katei ka jingialang u Bah John F Kharshiing, Adviser & Spokesperson, Federation of Khasi States u la aiti ruh ha u Bah Ernest Mawrie, President, Meghalaya BJP ia ki jingaijingmut ka kaiphod (Report) na ka National Commission for Review of the Working of the Constitution (NCRWC) kaba la thung ha ka por u Prime Minister Vajpayee ia kaba katei ka NCRWC Commission ka la dep ai sha ka Government of India ha ka 31 tarik March 2002. Bad kawei na pdeng ki jingaijingmut kiba bun ha ban pynbeit thymmai ia ka Sixth Schedule ka long ban shu sieh (nominate) San ngut ki Syiem, san ngut ki Dolloi bad San ngut ki Nokmas kum ki Nominated members ha ka Khasi, Jaintia, kum shi bynta ban pynkup bor ia ki Hima/Elaka bad ki Dorbar naduh Shnong, Raid haduh Hima.

U Bah John F Kharshiing, u la kyrpad ia u President Meghalaya BJP ban phah lem ia kine ki kot sha u Shri. Nalini Kholi, Spokeperson, BJP, uba la pan ia kitei ki jingtip bad ki kot ki sla na u Bah John F Kharshiing. U Bah John F Kharshiing, u la pyntip ba ha ka snem 2015-2016 ka State Cabinet kaba la ialam da u Dr Mukul Sangma, ha ka por ka Sorkar Congress hapoh ka jylla Meghalaya, ka la ai jingmut bad rai ban tyrwa ban don uwei u Member District Council uban shu sieh na ka liang ki Khlieh Nongsynshar (Syiem/Dolloi/Nokma).

U Bah John Kharshiing, u la kyntu jur ia u Bah Ernest Mawrie, President, Meghalaya BJP ban bishar bniah ia kine ki jingai jingmut teng na ka liang ka Sorkar Vajpayee led Government ha u snem 2002. U Bah E Mawrie, President, Meghalaya BJP, u la kular ban rah ia kane ka phang ban ia kren bad ki para nongkitkam ka party bad ban rah pat ia kane sha ki bor ba halor ha Delhi kum shibynta ban bishar bniah ia kane ka phang ha shwua ban pynbeit thymmai ia ka Sixth Schedule. Ha katei ka jingialang la pynsngew ruh ba ki bor KHADC ki la pyrshang teng ban thaw ka Council na ka bynta ki Khlieh Nongsynshar Hima Khasi bad la mynjur bad phah ia ki bill haduh lai sien kaba khatduh dei ha ka por long CEM u Late HS Shylla, hynrei baroh lai sien ka Sorkar jylla ka la kyntait da kaba jubap ba katkum ki kyndon Sixth Schedule ka KHADC kam don ia ka iktiar ban thaw mynjur ia kitei ki Bill. Kumta u Bah John F Kharshiing u la ong ba ka paw shai ba kane ka kam ka shong beit ha ka jingshemphang ka Sorkar India. La don ruh ka jingiakren halor ka jingdonkam ban pynduh ia ka jinglong liang ka jinglong politics(seng sain pyrthei) hapoh ki District Council hapoh ka jylla Meghalaya namar ba ki Dorbar ki dei kiba dei ban lait na ka politics seng sain pyrthei.

Na ka liang u Paiem Kestonbel Manik Syiemlieh Dy Syiem Khynnah Hima Nongkhlaw, President, FKS, bad u Bah Hamphrey L Ryntathiang, u Lyngdoh Hima Lyngiong, Secretary, FKS, ki la kyntu jur ia ki nongialam jong ka Meghalaya BJP ban sngewbha ban thaw ki lad ki lynti ban pynsngewthuh ia ki bor ka Sorkar Kmie kaba dei kaba la lam khmat da ka Seng BJP hapoh Ri India ba kin shim khia ban iathir ia tai sani bha halor kane ka Hok jong ki Hima Khasi States kumba la pruid dak ha ki dulir Instrument of Accession bad ki kyndon ha ka Annexed Agreement kaba 17 Aug 1948.