Syllang ki paidbah jong ki 2 shnong namar ka jingbym shimkhia ka tnat bording

Nongpoh, 11 lyngkot:
Tang namar ka jingbymsiew bai bording da ki katto katne tylli ki long iing ka pynlong ia ki ar tylli ki shnong ba kynthup ia ka Nong mawlong bad Mawlong Umpih kiba hap hapoh ka Umsning Constituency Ri Bhoi District, kiba dei ruh ki shnong kiba pyndonkam da u juh u Transformer kin hap ban shongdum mynta la palat shiteng snem.
Kum ban shu ong hangne, ka kynhun ki nongthohkhubor hadien ba ki la ioh ia ka jingujor na ki paidbah nongshong shnong halor katei ka jingduh bording kaba la palat shiteng snem, kumta khnang ban ioh ia ka jingpynshai na ka ophis ka MePDCL, na ka liang ki nongthohkhubor ki la leit ban iakynduh ia u Bah M. Khonglah, EE ka Ri Bhoi Distribution, Nongpoh Division, khnang ban tip ia ka daw jong ka jingbym bujli da ka tnat sam bording ia utei u Transformer.
Ha ka jingiakynduh ia u Bah M. Khonglah, la ioh ia ka jingshai kaba malu mala bad ka nongrim hi kaba pynlong ia kitei ki shnong ba kin hap ban shongdum mynta la palat shiteng snem, ha kaba ka daw ba hakhmat hi ka dei na ka jingpynsah bai bording jong ki paidbah, namar baroh kaba sah ka la poi haduh T. 2 Lak tam.
U la ong ruh, kawei pat ka bynta kaba pynlong ia ka tnat sam bording ban shimpor ha ka ban bujli noh ia utei u Transformer ka dei na ka jingduna Transformer, namar jan manla ka sngi haduh 6 bad 7 tylli ki Transformer kiba sniew, hynrei ka jaka ban maramot pat ia ki ka don tang kawei kata ha Sumer, Ri Bhoi.
Kumta haba iadei bad utei u Transformer ha katei ka shnong, na ka liang jong u Bah M. Khonglah, u la kular ba un sa shimkhia ban iakren bad ki bor bahalor na ka bynta ban pynioh noh ia u Transformer.
Ha kawei pat ka liang ka long pat kaei kaei kaba lyngoh ban tip, ba haba khein kyllum lang ia katei bai bording kaba la pynsah da ki nongshong shnong jong kitei ki ar shnong ka dei tang na ka jingbym siew da ki 4 tylli ki longing, ha kaba tang na kine ki 4 Iing ka la jan kot sha ka T.2 Lak, namar ia utei u Transformer la pyndonkam da ki 61 ki longing jong kitei ki ar shnong bad na kitei ki 61 ki longiing ki don tang kumba 17 iing ki bym pat siewdep, hynrei lait nangta jan baroh ki siew khuid bad ym don kiba pynsah.