Syllang ka ienglain bad ka iaknieh tiket peit phlim ‘Sa Shisien’

Shillong, 7 Nohprah:
Tang hadien 3 sngi ba la sdang ban pyni ia ka phlim ‘Sa Shisien’ ka la don ka jingiatuid jong ki paidbah ban leit peit ia kane ka phlim khasi ba la ring katkum ka juk ba mynta. Hynnin ka sngi lei lei la iohi ia ki paidbah kiba la syllang khait ban ieng lain bad kumjuh ruh ban iaknieh ha Bijou Cinema Shillong.
Ka phlim Sa Shisien ka dei kawei na ki phlim khasi kaba la thaw rikod ban dap briew smam ha ka sngi sdang pyni kata ha ka 4 tarik mynta u bnai bad la iohi ruh ia ka jingnang kiew jong kiba leit peit khamtam mynta ka sngi.
Mynta ka sngi ban leit peit ia ka show kaba 2 baje la iohi ia ki paidbah kiba la sdang ban ieng lain ap tiket naduh ka por shibaje duna bad ki la don bun ki paidbah ki bym shym ioh tiket shuh. Ha ka por 2 baje la iohi ia ki paidbah kiba la sdang ban khie bitar namar ka jingbym ioh tiket shuh bad kiba la ieng sah habar gate jong ka khyrdop Bijou da ka jingkhmih lynti ban ioh tiket.
Na ka bynta ban pynjai jai ia ki paidbah ki bym ioh tiket shuh la hap ban leit pynjai jai noh da u actor bah Phira Dohtdong uba don ha katei ka jaka pyni ia ka phlim ha Bijou Cinema uba la kyntu ia ki paidbah bym ioh tiket shuh ba kin wan peit noh ha ka por 5 baje janmiet.Na ka bynta ka show kaba 5 baje janmiet la iohi ia ki paidbah kiba la sdang ieng lain lypa naduh ka por 3.30 baje janmiet bad na ka bynta ka Balcony ki la don bun ki paidbah ki bym ioh tiket shuh wat ha ka show kaba 5 baje janmiet. Kane ka jingbun jong ki paidbah ban leit peit phlim khasi ka la nang ai mynsiem shuh shuh ia ki nongshna phlim khasi bad khamtam ia ka kynhun jong ka phlim Sa Shisien kiba la ai khublei ruh ia ki paidbah nongkyrshan kiba la leit peit ia kane ka phlim bad ha ka juh ka por ki la kyntu ia kito ki bym ioh tiket shuh ba kin leit peit pat ha ka sngi kaba bud.Haba u nongaikhubor u la ioh ban iakren bad ki katto katne ki paidbah kiba wan peit ia kane ka pyhlim mynta ka sngi ki la iathuh ba ka dei ka phlim khasi kaba itynnad bha. Na ka liang jong ki nongtrei jong ka Bijou Cinema pat ki la iathuh ba ka dei ka sien kaba nyngkong kaba la bun bha ki briew kat haduh ba bun spah ngut kim ioh tiket shuh.
Ka jingpyni ia kane ka phlim kan dang bteng mynta u taiew man ka sngi kata ha ka por 11 baje mynstep, 2 baje bad 5 baje janmiet bad la iathuh ba ia ka tiket kham suk ban ioh haba leit peit ha ka por 11 baje bad 5 baje janmiet. Ia kane ka phlim la ring ha Mumbai bad ha kiba bun ki bynta jong ka ri khasi.