Shillong: Haduh 11 ngut ki briew ki la mynsaw bad la pynkit ia ki sha Civil Hospital bad Woodland Hospital ban shah sumar hadien ba kawei ka kali ka la syllad naphang ia ki paidbah kiba dang iaid lynti ha Iew Mawlong, katei ka kali ka dei kaba wan na ki thaiñ Anjalee. Katei ka jingjia ka la jia ha ka por 3:55 baje janmiet hynnin ka sngi, ha kaba kawei ka Maximo pick-up kaba don ia u nombar ML/05-Temp/2018-1636 kaba don ia ka rong lieh ba la ñiah da u Pynshailang Kharlyngdoh (24 snem karta) ka la syllad naphang ia ki briew kiba iaid lynti.
Ka kali kaba leit tynrah klumar ia ki briew ha Iew Mawlong
Napdeng kiba la mynsaw 3 ngut na ki dei ki khynnah skul. Kiba la mynsaw malu mala ki la iathuh ba kim shym la poi pyrkhat satia ha ka por ba jia katei ka jingjia hynrei katei ka kali ka la shu wan tur kynsan ha ka jaka ba khapngiah briew. Ha katei ka por ki paidbah ki la ia lum khrui ha Iew Mawlong ban peit ia katei ka jingjia bad la iohi ruh ia kiba bun ki briew kiba ieng na ki mala ing kiba don hajan ban peit ia kane ka jingjia. Hadien ba la wad jingtip la iathuh ba u nongñiah jong katei ka kali u la shongshit kyiad bad ha ka jaka ban iuh ia u Brake ban pynjai jai ia ka kali u la kum ïuh pynban da u accelerator uba pynher sted man ia ka kali.