Syllad ka jingpang prie pynhiar ha Nongstoiñ

Nongstoin: Ka jingpang prie bad pynhiar ka la sdang ban pur stet bha mynta ha ka thaiñ Nongstoiñ bad katei ka jingpang kala ktah khamtam ia ki khyllung bad khynnah bad la lap ruh ba ka Civil Hospital Nongstoiñ kala dap smam mynta tang da ki nongpang bad wat ki khyllung ruh kila hap ban shu thiah ha Baranda kaba la i sangsot haduh katta katta.
Katei ka jingpang prie pynhiar kala sdang ban pur stet bha naduh u bnai ba la lah ha kaba da ki spah ngut ki nongpang khamtam ki khyllung ki la hap ban wad ia Ki jingsumar ba kyrkieh bad katei ka jingpang ka la ktah bha ia ki shnong kiba don hapoh ka sor Nongstoiñ kynthup ia ka shnong Nongpyndeng, Pyndengrei bad kiwei kiwei.
U Dr. Wompher Langbang doktor ba la pyntbit kyrpang ban sumar ia ki khyllung khynnah ha Civil Hospital Nongstoiñ u la iathuh ba ka jingpang prie bad pynhiar ka long kaba ma bha namar katei ka jingpang ka ktah stet bha ia ka koit ka khiah khamtam ia ki khyllung khynnah.
Kumta u la kyntu ia ki kmie ki kpa ba kidei ban shim khia ban wallam kyrkieh ia ki khun ki kti jong ki sha Hospital lada ki ioh ia katei ka jingpang khamtam ha kane kapor ba ka aiom ka kylla bad ba ki khniang jingpang ruh ki ioh bor bha bad u la ong ruh ba kane ka jingpang ka jur bha mynta la kumba lai taiew bad palat 600 ngut ki khyllung khynnah kila wan ban shah sumar ha kane ka hospital.
Ym tang kata u la ong ruh ba da ka jingtrei shitom ki doktor bad ki nos la lah ban ai ka jingsumar ba biang ia baroh kito kiba la wan sha hospital bad ha kajuh ka por u la ai jingmut ia ki kmie ki kpa jong ki khyllung ba ki dei ban lehkhuid ia ka bam ka dih bad ia ki tiar ki tar ba ki pyndonkam ban ai bam ia ki khyllung bad ki dei ban shet bha ruh ia ka um shuwa ban dih.