Syllad ka eriong ha thain Jirang

Shilllong, 07 Iaiong:
Ki  tnum iing ba bun bah ha ka thain Jirang ka Ri-Bhoi district ki la julor lut hadien ba la shah syllad ha ka eriong ha kine ki sngi. Ym tang ki iing ki sem hynrei ka eriong ka la pynjulor ruh ia ki jingthung jingtep kaba ka jia ha ka miet sngi Saitjain ha ka por 10 baje ei ei.
Katkum ka jingtip ba la ioh lum la iathuh ba don ki longiing kiba la phet ruma na la iing hapdeng ka jingdum ka miet ban leit rieh sha ki iing jong ki para marjan ba ki jaka ba ki sngew shngain, namar katei ka jingbeh eriong kaba long kynsan kynsan ka la pynsyier mynsiem shibun ia ki paidbah nongshong shnong ha katei ka thain baroh kawei.
La iathuh ba ha katei ka jingshah syllad eriong ha katei ka miet ka la pynjulor shibun ki iing ki sem bad kumjuh ruh ia ki jingthung jingtep bad la iohi ba wat ki dieng sohphan bad kiwei ki dieng ne ki siej ruh ki la kyllon bad dkhut lyngkot lyngkhai naba shah syllad ha ka eriong.
Kat haduh ba thoh ia kane ka khubor ym shym la ioh jingtip eiei la ki don ne em kiba la mynsaw na katei ka jingshah syllad eriong bad haduh katto ka jingjulor ka la shah ktah ha ki shnong ba kynthup ia ka Nongrim Jirang, Jareibasai, Umkremdykhong, New Umkrem bad kiwei shnong ba marjan.