Syllad biang U CEM ka KHADC ia u Dr Mukul

Shillong, 18 Naiwieng:
U CEM ka Khasi Hills Autonomous District Council (KHADC) u Bah Pynshngain N Syiem u la syllad biang ia ka jinglong nongialam u Myntri Rangbah ka jylla u Dr Mukul Sangma ba kum u para dkhot ka party Congress, um don shuh ka jingshaniah ia u.
Haba kren mynta ka sngi sha ki nongthoh khubor, u Bah Pynshngain u la ong ba u la dep pynsngew ia ki jing iakawang nia bad u Mukul Sangma sha ki heh ka AICC bad kan shong ha ka jingstad jongka ban ai ia ka rai bad ban wad ia ki lad ki lynti.“Nga la dep pynsngew sha ki heh ka AICC halor kane ba kin rai. Nga la iakynduh ia ki ha Delhi”, la ong u Bah Pynshngain bad bynrap, “ia mynta, ngam pat kwah ban kren eiei bad ngin ap ia ka rai ka AICC”.
Kham mynshwa u Bah Pynshngain uba la dep rai ban nym iatreilang shuh bad ka jinglong nongialam jong u Dr Mukul halor ka jingam ba u la thaw buit ban wanrah ia ka ain bam khang ar maloi ban kput ia u nalor ka jingbym shim khia ban pynlong ain noh ia ka VAB ka KHADC bad JHADC bad ban pynlait ia ka jingshah khang tih maw tih shyiap ha ka jylla hadien ba la khang ka NGT.“Ngi la duh ia ka jingshaniah ha u Dr Mukul namar ba hapoh ka jingialam jongu, ka sorkar kam shym la lah ban weng ia ki jingeh jong ki paidbah ha kaba iadei bad ka jingkhang tih dewiong, tih shyiap”, la ong u Bah Pynshngain haba kren hynne ka sngi sha ki nongthoh.U la ong, “U Myntri Rangbah u la pyrshang ruh ban khynra ia ki dorbar shnong da kaba wanrah da ka Ordinace bad thmu ban shna ain ia ki. Ka Village Administration Bill (VAB) ba la phah ka KHADC bad ka JHADC haduh mynta ka dang sahteng khlem pat ioh ia ka jingmynjur namarba ka sorkar jylla kam shym la shim khia ban buddien”,.
Haba takrain ia ka sorkar kaba shim da ka rai ban kyrpad sha ka sorkar pdeng ban pynmih da ka jingpynbna da u President ban pynlait ia ka jylla na ka jingkhang lad ki ain sorkar pdeng ha ka jingtih maw,tih dewiong ha kane ka jylla, u Bah Pynshngain u la ong ha ka jingshisha ia ka rai halor kane dei ban iasyllok bad ki district council ba kin shim da ka rai bad kin sa phah pat sha ka sorkar namar ba katkum ka Para A+B ka Sixth Scheduduled, ka dei ka kamram jong ka distict council ban peit ia ka khyndew ka shyiap.