Syier U Mukul, ioh shah trei ki PS ha ka ain mait kyrteng

Shillong, 30 Lber:
Shi sngi hadien ba u Parliamentary Secretary (PS) u Bah Lambok Mylliemngap u la iehnoh ia ka kam, u Myntri Rangbah u Mukul Sangma u la thoh pynsted wut wut sha u Lamphang ka Iing dorbar ban pynkylla ia ka ain ‘Meghalaya Legislative Assembly & Secretariat Rules’ khnang ban pynlait ia ki PS na ka jingshah mait kyrteng.
“Nga la thoh sha u Lamphang ka iing dorbar ban kyrpad ia u ban peit ia ki kyndon ba iadei bad kane ka ain ban pynkylla ia ka”, la ong u Muku Sangma haba kren mynta ka sngi sha ki nongthoh hadien ba la plie ia ka Digital branch ka State Bank of India (SBI) ha Shillong.
U Myntri Rangbah u sngew donkam kyrkieh ban pynkylla ia kane ka ain namar ba ka Article 164 (1) ka riti synshar ka ri (Amendment) Act, 2003 ka mana ia ka jingthung PS, namar ba ki iahap bad iaryngkat bad ka kyrdan myntri sorkar.
Katkum ka Meghalaya Legislative Assembly & Secretariat Rules ka kdew ba ki myntri sorkar ka mut ki dkhot jong ka kynhun myntri, ba kynthup ia ki myntri khynnah, symbud myntri, lane ki Parliamentary Secretary.
Ka 91 Amendment Act, 2003 ka la ong ba ka jingheh jong ka kynhun myntri kam dei ban palat ia ka 15 percent na ka jingdon jong ki dkhot ka iing dorbar.
Ha Meghalaya dei ban don tang 12 ngut ki myntri sorkar kynthup u Myntri Rangbah.