Syier ki nong Mawshun, ba jan khyllem u nar ilektrik

Shillong:Ki nongshong shnong ka Mawshun, kaba don harum Pynursla, ki don ha ka jingsyier mynsiem, ha kine ki sngi ba jur ka jinghap slap bad khie eriong, namar ba u don uwei u nar ilektrik, uba ieng harud surok bah, uba la shong synjor.

Na ka jingiakren bad kawei ka longiing, kaba don ha syndah jong utei u nar ilektrik, ka pynpaw ia ka jingsyier mynsiem kaba khraw, namar ba la iohi, kumba utei u nar ilektrik, u lah ban khyllem ha kano kano ka por ba ka wan ka jingbeh lyer kaba jur lane ha ka por ba ka don ka jingthaba leilieh bad tied jong u pyrthat.
La iathuh shuh shuh, ba ha utei u nar ilektrik, ki la don ki trok kiba iaid lynti, kiba la ju leit lymbub ia utei u nar ilektrik bad haba ka don kaba kum katei ka jingjia, la iohi ia ka jing ia tyngkhuh ki sainar bad nangta sa ka ding kaba bsiat sawdong jong katei ka jaka.
Na ka jing iathuh ki bor shnong jong ka Mawshun, la iathuh ba ki la iakren bad ki bor MeECL na Pynursla, hynrei kim shym la leit satia ban maramot ia utei u nar ding haduh ha kine ki sngi.