Sumar khmat ei ka MYF ha Markasa

Shillong, 23Jylliew:
Ka Meghalaya Youth Foundation ha ryngkat ka jingiatreilang bad ka Mission Trust, Bawri Netharalaya, Shillong ka la pynlong ia ka jingsumar khmat ei “Free Eye Check-Up Camp” ha ka shnong Markasa kaba hap hapoh Mawthadraishan Block, West Khasi Hils District ha ka 21 tarik mynta u bnai naduh ka por 11:30 mynstep.
Kumba 140 ngut eiei ki paidbah kiba la wan na ki shnong bapher bapher kum na Markasa, Umjakoid, Umsaw, Nongkasen, Pariong, Mawroh, Umkrem, Nongriat, Mawphanlur jong ka West Khasi Hills ki la wan ban shah sumar bad ban phah peit ha katei ka sngi. Katto katne ngut na kiba la wan sha katei ka jaka la ai iit khmat ei ba kin pyndonkam, katto katne ngut na ki la iarap ba kin ioh jingsumar ei kaba kham bha katkum ki jingdonkam bad don ruh na ki kiba hap ban phah puid ha kaba kin ioh ei ia ka lad ban shah puid khlem kano kano ka jingsiew.
Ia kane ka prokram kaba nyngkong eh ba ka MYF ka la pynlong ha ka shnong Markasa la wan ban plie da ka kongsan ka Dr. Fenela Nonglait, VC jong ka Meghalaya State Law Commission, ha ryngkat ka jingiadonlang jong Chairman jong ka Meghalaya Youth Foundation, Joannes JTL Lamare; Dr. V. Surong bad ki kynhun doktor ba la ia wanlang na Bawri Nethralaya kiba la air uh ia jingsumar bad ka jingpeit ha katei ka sngi la ia donlang ruh u sordar ka shnong Markasa u Bah Stenis Pyngrope, bad ki dkhot jong ka Dorbar Shnong.
Khyndiat por shuwa ban sdang ka jingsumar bad ka check up la ioh ki jingkren na u shongknor Joannes JTL Lamare, i Dr. V. Surong ha kaba ki la batai shaphang ka jingdonkam ka khmat bad ki jingsumar ia ka bad kumjuh ruh ki jingbam kiba hap ban bam na ka bynta ban pyniohbor ia ka khmat ha kaba ki la kular ruh ba ka jigdonkam hadien ba la peit ia ki khmat jong ki nongshah sumar kin pyndep khlem kano kano ka jingsiew.
Haba kren kum ka kongsan ka doktor, Dr. Fenela Nonglait ka la ong ba kiba kum kine ki prokram ki dei kiba donkam tam ban poi ha ki shnong bad ki thain namar ba bun ngut ki paidbah kiba donkam ban ioh ia kaba kum kane ka lad khamtam ban sumar ia ki khmat jong ki. Ka la ai khublei ruh ia ki doktor na Bawri Nethralaya kiba la pyllait ia kip or jong ki ban don bynta ha katei ka sngi.