Sumar ei ia kiba kad shyntur

Nongpoh, 04 Jylliew:
Ka khubor babha na ka bynta kito ki briew ba kad shyntur, ha Ri-Bhoi District ka long ba kan don ka jingsumar ei ia ki, ia kaba la pynlong da ka Operation Smile, India na Guwahati, kaba long kawei na ki seng treimon sngewbha ban iarap ia ki briew kiba don jingduna ha ka shyntur. Kane ka jingsumar ei kan long ha ka 7 tarik Jylliew mynta ka taiew, ha Civil Hospital Nongpoh naduh ka por 9 baje mynstep.
Ban rat dyngkhong ia kane ka jingpang, ka Samla Hazel Wahlang, Person Counselor jong kane ka kynhun treimon sngewbha ka la iathuh ba ka synjuk ka don ia ka thong ban ai jingsumar ei naduh ki khyllung khynnah, haduh kiba la rangbah ne tymmen. Ka la ong ruh ba kito kiba wan najngai ki shnong kin ioh ia ka bai lynti bad bai lut bai sep, khnang ba kan long ka jingmyntoi ia ki ban wan sha katei ka jaka kumba la pynbeit. Kane kajuh ka prokram kan long ruh ha sor Jowai, ha ka 6 tarik Jylliew, ha kaba yn pynlong ha Jowai Civil Hospital bad ha ka 8 tarik Jylliew pat kan long ha Nongbah Shillong, ia kaba yn pynlong ha Shillong Civil Hospital.