Suba pyniap u pyrsa ia u kni

Shillong, 11 Nohprah:
Ki pulit ha kane ka sngi Saitjain ki la ioh tam ia ka met iap jong uwei u briew ba kyrteng u Hedrin Rynjah na ka ïing sah wai ha Dongkanan hapoh ka shnong Laitkyrhong ka East Khasi Hills District. Katkum ka jingiathuh ki pulit, hadien kane, kila lap sa ia ka met iap jong u Bikostar Rynjah na jan khlaw ba la sdien phasi.
Ki pulit ki ïathuh ba katkum ka jingtohkit, na kiba ha ïing ha sem jong kine kiba iap baroh ar ngut, la suba jur ba u Bikostar Rynjah u la pyniap ïa u kñi jong u, u Hedrin Rynjah bad hadien ba la dep ban leh ïa kane ka kam u la leit sha khlaw ban sdien phasi ialade.
Ki pulit ki la ong ba kine ki briew baroh ar ngut kila jah na ïing naduh ka san tarik mynta u bnai. Ki pulit kila pyndep ïa ka post mortem bad ka jingtohkit kan dang iaid ban lap ia ka daw tynrai halor kane ka jingjia.