Suba jur ki pulit Bangladesh, ba thmu hiar thma ki ISIS sha ka dong shatei Mihngi

Ki pulit syntiat jong ka India bad ka Bangladesh, ki don ha ka jing peit siar kaba jur bha ha kine ki sngi, halor kawei ka mesej kaba la thoh da ki ehrang Islamic State, kaba ki la byrngem ban hiar thma shen ia ka thain shatei lam mihngi. Ki heh pulit syntiat na Bangladesh, ki pynsngew ba ki la iakren bad ki pulit na India bad ki la rai ba kin syntiat bha ha kine ki sngi, halor kawei ka jingthoh, kaba ong  ha ka ktien Bengalee ‘Shigroi Asche Inshallah’ (Da ka mon U Blei, ngin sa wan shen)’.

Katei ka jingthoh ka don ia ka logo jong ka  Al Mursalat, kaba dei ka kyntien arabic bad kaba mut ia ka  Jamaat-ul-Mujahideen Bangladesh (JMB), kaba la hiar thma tyngeh ha  Holey Artisan Bakery ha Dhaka lai snem mynshwa.

Ki pulit syntiat ki shim ba katei ka jinghiar thma, ka thew na bynta ka Bangladesh bad sha ki bynta jong ka thain shatei lam mihngi jong ka India, ha kaba la shim ba ka  JMB, ka trei kam bha.

Katei ka dei ka seng lehnoh, ha kaba ki dkhot kiba dang shu rung thymmai, ki dei na  Bangladesh, West Bengal bad na Assam.

“Ngim shym la kyntait satia, ba kan lah ban don ka jinghiar thma shen ha Bangladesh bad ha ki bynta ba marjan kum ka West Bengal bad ka Assam bad kumta ngi shim khia bha ia kane ka jingthoh. Ngin nym leh ia kajuh ka jing bakla, kaba la leh da ka Sri Lanka” ong u heh pulit na Bangladesh.