Stadium Shillong la jan iaryngkat ka Stadium ka BSA Byrnihat, jurip ki nongialam BSA ban dep kloi ka kam

Nongpoh, 14 Rymphang: Ki nongialam ka Byrnihat Sports Association (BSA), mynta ka sngi, ki la leit ban jurip ia ka jingpyntrei ia ka Madan Byrnihat Stadium, na bynta ban tip ba haduh katno ba la dep ka jingpyntrei ia katei ka madan, kaba la shna janai bha bad kaba la iasyriem bad ka Madan SSA Stadium ha Nongbah Shillong.

Lyngba jong katei ka sngi, ba kitei ki nongialam ka BSA kaba la ialam da u Bah Wanpher Lyngdoh, General Secretary ka BSA, ha ryngkat ka jingdon u Bah Iaineh Wahlang lem bad ki samla na ka shnong Nongthymmai Byrnihat, ha kaba lyngba katei ka jingleit jurip jong ki, la lap ba katei jingpyntrei ka la iaid shaid shaid bad ba ka kam ka la dep kumba 80 persen.

Haba peit ia ka jingshna ia katei ka Stadium, kata naduh ka jaka shong ki nongpeitkai bad kumjuh ruh ki jaka sah bad ki jaka khreh jong ki nongialehkai, ka la dei kaba biang eh, namar haba peit ia ka jaka shong ki nongpeitkai, la don da ki jingtap ba naneng bad kaba la biang lut nadong shadong, kaba sa long ruh kawei na ki madan ialehkai ba biang tam ha Ri Bhoi.

Haba kren sha ki Lad Pathaikhubor, u Bah Wanphrang Lyngdoh, u la ong ba kum ki nongialam ka BSA, ki da sngewkmen eh ba ki la ioh ia katei ka Stadium bad khamtam eh haba ki iohi ba ka jingpyntrei ia ka kam, ka long kaba bit ba biang bad sa tang katto katne bnai yn sa lah ban plie paidbah noh.

Halor ka jingurlong katei ka Stadium, utei u nongialam ka BSA u la ai ka jingiaroh kaba nyngkong eh ia u Bah Sosthenes Sohtun, MLA Jirang bad ha kajuh ruh ka por, ba u dei u President ka Byrnihat Sports Association. Nalorkata u la ai ruh ka jingiaroh ia ka sorkar jylla bad kaba la lamkhmat da u Conrad K. Sangma kum u Myntri Rangbah.

U la ong ruh, ba kaba sah mynta, ka long sa tang ban pynbha ia ki bynta ka madan ba ialehkai bad kata ka long ban kyntiew kham shaneng ia ka madan bad ruh ban shna ia ki nala pyniaid um, khnang ba ka madan kan ym ktien haba ialehkai ha ki por Lyiur.

Ym tang ki nongialam ka BSA, kiba la sngewkmen ba la urlong katei ka Stadium, hynrei ki samla na ka thain Byrnihat ruh, ki la sngewkmen eh halor katei ka jinglah ban urlong katei ka Stadium bad halor kata, ki la ai ka jingkhublei kaba kyrpang eh ia u MLA ka Jirang, namar ka jingtrei shitom ka jong u, na bynta ban pynurlong ia katei ka Stadium, kaba la ap khmieh lynti da ki phew snem mynshwa.