Shillong:Hadien ka jingshah rem kaba saw sien kynthih, ka Sawmer SC hynnin ka sngi ka la lah ban pynehdaw noh ialade da kaba ioh ban khur ia ka poin kaba nyngkong jong ka hadien ba ka la lah ban pynliem noh ia ka Ryntih SC da 4-0 ba la ialeh ha SSA Stadium Polo.
Kiba la ioh ban pynkhih jar ki kynthup ia u Diego Khriam ha ka minit kaba 27, Lamshaphrang Kurbah ha ka 61 minit, kawei pat ka kol kaba la thep bakla da ka Ryntih ha ka 81 minit bad u Rheadolf Daloi ha ka 90 minit.
U Diego ha shuwa ban ioh ban thep ia ka kol kaba nyngkong jong ka kynhun, u la duh ei ia ki ar tylli ki jingpyrshang jong u, hynrei ha ka sien pyrshang kaba lai u la lah ban kyntiew ia la ka kyrteng ha ka miej iakhein poin.
U Lamshaphrang kumjuh u la ioh kawei ka jingpyrshang kaba lah ban dei kaba ka kabu itynnad bha, haba u la kynjat tyngeh ia ka bol na shiteng madan sha pyrshah ka jar, hynrei u Dipanjan uba la ap ia ka kol u la lah noh ban kyndat ia ka bol sharud.
Na ka liang ka Ryntih ruh ka la don kattno katne ki jingpyrshang kiba biang, bad kawei na ki ka la long na u captain Washan Dkhar kaba long ha ka kylla step, haba u la pyntyngkhuh ia ka bol da ka khlieh hynrei u Banehskhem Khongsdam uba la ap ia ka jar u la ioh noh ban kyndat sharud.
Ka jingthep kol jong u Lamshaphrang ka la long tang mar ia dap shikynta ka jinglehkai haba u la ioh bol na ka phang ka mon ia kaba ka Ryntih ka dang mut ba ka dei ka off side, hynrei haba u assistant refree ym shym la pynbna ei ei, u Lam u iai bteng ban rah ia katei ka bol ha kaba u la iakhun tang para marwei bad u Dipanjan bad kumne u la ioh ban pynrung ia ka bol na ka phang ka mon jong u dieng kol
Arphew minit hadien kane, u Mark Austin Wanswett uba la thmu ban pas ia ka bol sha ka phang ka mon ha kaba don u Melvin Warjri, hynrei ha ka jingialeh jong u Melvin ban ym ailad ia u Diego ban knieh ia ka bol, u la mareh lypa da kaba stet shakhmat shakhmat, hynrei ha ka jingbym lah ban teh lakam ialade bad ia ka jingtyllun jong ka bol, u la duh noh ban pynsangeh ia ka bol kaba la leit tyllun beit beit sha la ka jar jong ka kynhun lajong.
Ka lad thep kaba khatduh jong ka Sawmer ka la long da ka jingioh penalty kick ia kaba u Rheadolf Nongneng Daloi u la lah ban pynrung ia ka kol kaba saw jong kane ka kynhun ha shuwa ban pynkut noh ia ka jinglehkai.
Hadien kane ka jingiakhun, ka Ryntih ka dang neh ha ka kyrdan kaba saw da hynniew poin da kaba tam shi poin ia ka Langsning FC kaba dang don sa ar tylli ki jinglehkai kiba dang sah.
Ka Sawmer mynta ka la ioh 3 poin ha ryngkat ka Nongthymmai SC bad ka Nangkiew Irat SC.
Mynta ka sngi pat, ka jingiakhun kan long hapdeng ka Nongthym mai pyrshah ia ka Lang sning naduh ka por 3:15 janmiet.
Phi don ban ong eiei?