Shillong:Ka Langsning FC kaba la lah ban pynbam da 6-0 ha ka jingiakhun hynnin ka sngi pyrshah ia ka Rangdajied United FC ka la ioh ban rung ha ka jaka kaba khatduh jong ka jingiakhun semi final jong ka lympung Shillong Premier League 2023 ba la ialeh ha SSA Stadium Polo.
U Nelson Rymbai u la ioh ban thep hat-trick ha ki minit kiba 79 bad ar tylli kiba u la thep da ka penalty kick kaba long ha ka minit kaba 57 bad 90+2.
Kiwei pat kiba la pynrben ia ka kol jong ka Langsning ki long u Kitboklang Pale ha ka 45 minit, Overkindness Lyng doh Mawnai 60 minit bad u Sheen Sohktung ha ka 69 minit.
Na ka liang ka Rangdajied kaba la thikna ialade ha ka kyrdan kaba nyngkong ha ka miej iakhein poin, kumta kam da salia than ia kano kano ka jingmih na kane ka jinglehkai, namar ba ka la dep ban pyni bor lut ialade ha kane ka samoi ialeh jong ka SPL 2023.
Hynrei watla katta, kum ka kynhun kaba la ieng nyngkong ka long ka bym shym la khmih lynti ba kan shah pynbam haduh kattei ha ka liang pyrshah kaba la long ka sien kaba nyngkong jong ka ha lynter kane ka samoi ialehkai ba kan nym ioh wat tang shi poin ruh haduh kaba kut ka jinglehkai.
Tang mar ia sdang ka jinglehkai, ka Lang sning ka la pynpaw lypa ia ka jingangnud jong ka ban thom halade ia ka jinglehkai, bad kane ka la paw shai ba tang ha ka minit kaba nyngkong ba la sdang ka jinglehkai ka la ioh ban pyrshang da kaba pynher ia ka bol kham hajrong u diengkol.
Kumne, tang ha shuwa ban pynkut ia ka kylla step u Kitboklang u la ioh noh ban pynkhih ia ka jar hadien ba ka Rangdajied ka la bakla ban ai bol ha u Kitboklang uba kam shym la peit bha satia. Ha ka kylla miet, ka jingioh penalty kick kaba nyngkong jong ka Langsning ka la long hadien ba u Chanmitre Thma u la shah knieh bol ha u Nelson uba la wan bujli ha ka kylla step bad une u la lah ban thep ia ka kol da kaba u phah ia u nongap gol shah ka side bym dei.
Hadien katto katne minit pat, u Overkindness u thep ia ka kol ba itynnat tam ha kane ka jingiakhun tang hapoh ka 54 phut, hapoh ka jar lyngba u Ialamlang.
U Nelson u la iarap ban pynioh ia ka kol ba saw ruh, na ka bol ba shut ma u shah kol, hynrei kan sa leit poi pat hakhmat jong u Sheen bad un sa pynrung ma u pat ia ka kol.
Une u no, 10 jong ka Langsning u nym shah khang lad ban ioh ia ka kol ba ar, ha kaba u Kitboklang u rah ia ka bol hapdeng ka madan ha ka 79 minit, u ioh pynmih ia u nongap gol shabar ka kol bad pass ia ka bol shah kamon jong u Nelson ban thep ia ka kol.
Da kaba ioh jop saw sien kynthih, ka Langsning mynta ka la lait ban ieng sah ha ka kyrdan kiba sha tbian hadien ba ka la duh ha ki ar tylli ki jinglehkai kiba hakhmat.
Ka Langsning mynta ka la ioh kamai 12 poin da kaba ieng lang bad ka Shillong Lajong FC. Lait noh na ka Rangdajied kaba ieng ha ka kyrdan kaba nyngkong, ki kyrdan kiba ieng hapoh ka lain kaba saw ki dang lah ban khih ha ki jinglehkai kiba bud.
Mynta pat ka jing lehkai kan long hapdeng ka Sawmer SC bad ka Nongthymmai SC ka ban sdang naduh ka por 3:15 janmiet.
Hadien ki jingialeh kiba eh ia kiba kine ki kynhun ki lah iakynduh ha ki jingiakhun kiba la dep, ka jingiakhun hapdeng kine ki kynhun mynta ka sngi kan long ka itynnad ha kaba kan long ka sien kaba khatduh ba kin ioh ialeh ha kane ka samoi jong ka SPL 2023.
Phi don ban ong eiei?