Shillong: Ka Langsning FC kala rah ia ka nam lahduh jong ka lumpung Shillong Premiere League mynta u snem ba pyniaid da ka Shillong Sports Association (SSA).
Ha ka jingiakhun myn hynnin ka sngi, ka Langsning ka la pynliem ia ka Shillong Lajong FC da 1-0 ha ka jingiakhun kaba iakhaid bha hapdeng jongki haduh ban kut ka 90 minit.
Ia ka kol ka jingjop ka Langsning lah thep da u Kitboklang Pale ha ka kyllastep ka 16 minit. Kane ka kol ka la pynlong ia ka Langsning ban rah ia kane ka thong kaba la neh tden haduh ban wai syndon ka kyllamiet.
Ha ka jingialehkai, la iohi ba baroh ar liang, ki la iakhun bha ban iaknieh ia ka nam lahduh hynrei ha kaba kut, ka Lajong kam lah ban leh eiei naduh ka kyllastep haduh ka kyllamiet.
Kane ka dei ka sien kaba ar lynter ia ka Langsning ba kan rah ia kane ka nam lahduh ha kane ka lumpung ialehkai kaba heh tam ha ka nongbah Shillong.
Ia ka nam best Goalkeeper la ioh u Phurba Thempa na ka Lajong, ia ka nam Man of the Match la ioh da u Kitboklang Pale Langsning FC.