Sospon 3ngut; pyndam ia ka Seng Kynthei & Samla HSPDP Nongstoin

Nongstoiñ, 16 Jymmang:
Ka Executive Committee jong ka Party HSPDP Nongstoiñ Area Unit, kaba la shong kyrkieh mynta ka janmiet hapoh ka ophis treikam kaba don ha Nongstoiñ, da kawei ka jingmut ka la shim ia ka rai ban sospon noh ia ki ar ngut ki nongkit kam jong ka Party haduh 3 snem kynthih bad ka EC ka la shim ruh ia ka rai ban pynduh pyndam noh shwa shipor ia ka Seng Kynthei bad ka Seng Samla jong ka Nongstoiñ Area Unit.
“Ka jingshim rai jong ka party ban sospon noh ia kitei ki ar ngut ki nongkitkam jong ka party kiba kynthup ia u Joint Secretary jong ka Nongstoiñ Area Unit Parent Body u bah Marcus Marwein Joint Secretary jong ka Nongstoin Area Unit Parent Body bad ia ka kong F. Marngar, Secretary jong ka Women’s Wing haduh lai snem, ka dei namar ka jingialeh pyrshah ka jong ki ia ka riti treikam jong ka party bad ha kaba iadei pat ban pynduh noh shwa shipor ia ka Youth Wing bad Women Wing ka dei namar ka jingdon jong ki katto katne ki briew kiba thmu ban ialam bakla ia ki paidbah nongkyrshan jong ka party da kaba ialeh pyrshah bad pynthoh bria ia ka party” ong u bah Jyndiang President jong ka party ha ka jingiakren bad ki nongthoh khubor.
Shuh shuh u bah Jyndiang u la pynpaw ruh ia ka jingsngew khia kaba khraw halor ki kynrum kynram kiba la mih hapoh jong ka party, namar ka jingdon jong ki nongtrei party kiba pyrshang ban pynthohbria pynban ia ki jingiaid beit jong ka party, bad u la ong ruh ba nalor kitei ki ar ngut ia kaba ka EC ka la rai ban sospon shwa shipor, ki dang don ruh sa kumba katto katne kiba don bynta lang kiba la leh lyndet ia ka party kynthup ia ki nongialam jong ka Youth wing ha kaba ki la leit ai jingthoh sha u President ba rangbah jong ka party, ban pynpaw ia kata ka jingpyrshah bad ka jingbym hun ka jong ki ia u kandidet jong ka party kata ia u President ka Nongstoiñ Area Unit u ba dei ruh ha kajuh kapor u MLA ma Nongstoiñ.
Ha kaba iadei pat bad ka Tiket na ka bynta ki Kandidet na ka liang jonh u bah T. Lyngdoh Vice President jong ka party, u la ong ba halor ka jingphah ktien jong ka Central Body ban phah noh ia ka kyrteng u jong u Kandidet u ba long ruh u MLA kata u bah D. Jyndiang ban pynbiang noh ia ki jingdonkam baroh bad ia katei ka jingbthah jong ka Central Body, ka Party ka la dep ban leh kata da kaba kala la phah ruh ia ka kyrteng jong u bah D. Jyndiang ki u Kandidet bad ka rai ba khatduh kan shong beit ha ka Central body.